BE-ja thotë se ka rrezik që Hamasi t’i transmetojë ekzekutimet drejtpërdrejt

Komisioneri i Bashkimit Evropian për tregun e brendshëm, Thierry Breton, ka thënë se u ka kërkuar platformave të rrjeteve sociale që të përgatiten për rrezikun nga “transmetimet e drejtpërdrejta të ekzekutimeve” nga Hamasi.

Ai ka theksuar se po kërkon të sigurohet nga platformat se janë të përgatitura për mundësitë e tilla dhe se mund t’i parandalojnë.

Një zëdhënës i Hamasit ka thënë javën e kaluar se Hamasi do të fillojë t’i ekzekutojë pengjet civile dhe t’i transmetojë nëse Izraeli i shënjestron njerëzit në Gaza pa paralajmërim.

Breton ka shtuar se platformat duhet ta respektojnë ligjin, raportoi CNN. 

“Specifikisht u kemi kërkuar që të përgatiten për rrezikun e transmetimit të drejtpërdrejt të ekzekutimeve nga Hamasi – një rrezik nga i cili duhet të mbrojmë qytetarët tanë – po kërkojmë siguri se platformat janë të përgatitura mirë për mundësi të tilla”, ka thënë Breton.