Udhëheqësi i burgosur i opozitës ruse, Alexei Navalny thotë se ai është transferuar në izolim të përhershëm.
Navalny tha se lëvizja ndodhi vetëm disa ditë përpara një vizite të planifikuar familjare, dhe kishte për qëllim t'i mbyllte gojën atij, raportoi BBC-ja të premten.
Ai tashmë po përballej me 11 vjet e gjysmë burgim për një sërë akuzash, duke përfshirë edhe për akuzën për mashtrim, për të cilat ai tha se janë të sajuara.
46-vjeçari ka qenë prej kohësh fytyra më e spikatur e opozitës ruse ndaj presidentit,Vladimir Putin.
Navalny tashmë po mbahej në izolim, i quajtur gjithashtu "qeli dënimi", por ai mund të mbahej atje vetëm për 15 ditë, sipas një postimi në llogarinë e tij në Instagram.
Por në një seri postimesh të enjten, kritiku i profilit të lartë të Kremlinit tha se ai ishte akuzuar nga zyrtarët e burgut si një "shkelës i rëndë" dhe u transferua në një "dhomë të tipit qeli". Të drejtat e tij për vizitë janë kufizuar gjithashtu.
Ai tha se izolimi i tij i ri është "një qeli e rregullt e ngushtë, si qelia e dënimit, përveç që mund të kesh jo një por dy libra dhe të përdorësh kioskën e burgut, megjithëse me një buxhet shumë të kufizuar."
Anëtarët e familjes së tij, duke përfshirë nënën, babanë dhe gruan e tij Yulia, do ta vizitonin katër ditë pasi u shpërngul, tha Navalny.
“Po e bëjnë për të më mbyllur gojën. Pra cila është detyra ime e parë? Ashtu është, të mos kem frikë dhe të mos mbyll gojën”, ka shkruar ai.
Navalny po mbahet në një koloni penale më shumë se 250 km në lindje të Moskës. Ai u arrestua me tu kthyer në Rusi nga Gjermania, ku ishte trajtuar pas helmimit me agjent nervor.
Ai fillimisht u burgos për dy vjet e gjysmë për thyerjen e kushteve të lirimit me kusht ndërsa po trajtohej në spital, por më pas iu dhanë nëntë vjet shtesë për mashtrim dhe përbuzje të gjykatës.
Në maj të këtij viti ai humbi një apel kundër një dënimi me nëntë vjet burgim për akuzat e mashtrimit, gjatë të cilit ai filloi një sulm të ashpër ndaj luftës së Rusisë në Ukrainë.
