Një aeroplan privat rus me të cilin po udhëtonin gjashtë persona është rrëzuar në një zonë rurale të Afganistanit, raporton agjencia “AP” të dielën. Talebanët kanë thënë se piloti e disa prej personave i kanë mbijetuar rrëzimit.
Aeroplani u rrëzua të shtunën në një zonë malore në provincën Badakhshan, ka thënë zëdhënësi rajonal i Talebanëve, Zabinullah Amiri.
Provinca është 250 kilometra në verilindje të kryeqendrës së Afganistanit, Kabul.
Në këtë zonë banojnë vetëm disa mijëra persona.
Ministria e Transportit dhe Aviacionit Civil i Talebanëve ka thënë të dielën se aeroplani është gjetur në provincën Kuf Ab.
“Piloti u gjet nga ekipet e kërkimit të Emiratit Islamik të Afganistanit. Sipas pilotit, katër persona përfshirë edhe ai janë gjallë. Ekipet po vazhdojnë të kërkojnë për të mbijetuarit tjerë”, thuhet në deklaratë.
Në Moskë, autoriteti rus i aviacionit civil ka thënë se aeroplani Dessault Falcon 10 u zhduk me katër anëtarë të ekuipazhit e dy pasagjerë. U tha se ishte ndaluar komunikimi fillimisht e më pas u zhduk nga ekranet e radarit. Zyrtarët rusë kanë thënë se aeroplani ishte ndërtuar në vitin 1978.
Komiteti Hetimor i Rusisë ka thënë se ka hapur rast për të shikuar nëse kishte shkelje të mundshme të rregulloreve të sigurisë ajrore.
e Ministrisë së Jashtme të Rusisë, Maria Zakharova, ka thënë se Ambasada e Rusisë në Afganistan po punon me zyrtarët lokalë në lidhje me ngjarjen.