-
Përktheu:
Flutura Gashi-Mehmeti
- 4 shtator 2024 18:30
- Shpërndaje në:
Administrata e Bidenit njoftoi të mërkurën për akuza penale, sekuestrimin e domeneve të internetit dhe sanksione në lidhje me përpjekjet ruse për dezinformim, për të ndikuar në zgjedhjet presidenciale të 5 nëntorit në SHBA.
Prokurori i Përgjithshëm, Merrick Garland ka thënë të mërkurën se veprimet kanë të bëjnë me përdorimin e medias shtetërore nga Rusia për të tërhequr influencues amerikanë për të përhapur propagandë dhe dezinformim, raporton AP.
Veprimet e ndërmarra nga qeveria e SHBA-së përfshijnë sanksione kundër drejtuesve të RT-së, një organizatë shtetërore e medias që u detyrua nga Departamenti i Drejtësisë të regjistrohej si agjent i huaj, si dhe kufizime për viza.
Pjesa më e madhe e shqetësimit rreth Rusisë përqendrohet në sulmet kibernetike dhe fushatat e dezinformimit të krijuara për të ndikuar në votimin e nëntorit.
Taktikat përfshijnë përdorimin e mediave shtetërore si RT për të avancuar mesazhet dhe përmbajtjet anti-SHBA, si dhe rrjetet e faqeve të rreme dhe llogarive të mediave sociale që përforcojnë pretendimet dhe i injektojnë ato në bisedat online të amerikanëve.
Në shumë raste, amerikanët mund të mos e kenë idenë se përmbajtja që ata shohin në internet ose e ka origjinën ose është përforcuar nga Kremlini.
Autoritetet thonë se dy kompani ruse krijuan faqe interneti të rreme dhe profile të mediave sociale për të përhapur dezinformimin e Kremlinit.
SHBA-ja do ta akuzojë Rusinë për ndërhyrje në zgjedhjet e vitit 2024
Administrata Biden të mërkurën planifikon të ngrejë akuzë ndaj Rusisë për përpjekje të vazhdueshme për të ndikuar në zgjedhjet presidenciale të 2024-ës në SHBA, duke përdorur mediat e drejtuara nga Kremlini dhe platforma të tjera online për të synuar votuesit amerikanë me dezinformata, i kanë thënë CNN-it gjashtë burime të njohura me këtë çështje.
Pritet që SHBA-ja të bëjë një sërë lëvizjesh të mërkurën që synojnë adresimin e përpjekjeve të Kremlinit, duke përfshirë Shtëpinë e Bardhë që pritet t’i dënojë publikisht veprimet, dhe Departamentin e Drejtësisë që pritet të shpallë veprimin e zbatimit të ligjit që synon fushatën e fshehtë ruse, thanë burimet.
RT, rrjeti shtetëror rus i medias, është fokusi kryesor i SHBA-së, thanë burimet. Zyrtarët amerikanë e shohin median ruse si një pjesë kyçe të përpjekjeve të propagandës së Kremlinit.
“Operacioni rus i dezinformimit po pastrohet përmes zërave amerikanë dhe joamerikanë”, thanë katër nga burimet.
Veprimet do të ishin përgjigja publike më domethënëse e administratës Biden ndaj operacioneve të supozuara të ndikimit rus që synojnë votuesit amerikanë.
Pasi SHBA-ja akuzoi Iranin se u përpoq të hakonte si fushatën e Trumpit ashtu edhe atë Biden-Harris muajin e kaluar, veprimet e së mërkurës janë një kujtesë se zyrtarët amerikanë vazhdojnë ta shohin Rusinë si një kërcënim të rëndësishëm të ndikimit të huaj për zgjedhjet e nëntorit, thanë burimet.
Të mërkurën pasdite, Prokurori i Përgjithshëm, Merrick Garland do të mbajë një takim të Task Forcës për Kërcënimet Zgjedhore të Departamentit të Drejtësisë, ku do të marrin pjesë drejtues të lartë të zbatimit të ligjit, duke përfshirë drejtorin e FBI-së, Christopher Wray.
