Prokurorët në rastin e influencuesit të mediave sociale, Andrew Tate, i cili po mbahet në Rumani nën dyshimin për përdhunim dhe trafikim të grave, kanë thënë se ai i shndërronte në skllave gratë me të cilat kontaktonte përmes internetit.

Një grua nga Moldova mendonte se po bëhej fjalë për dashuri, pasi Tate i kishte ofruar asaj një jetë të re. Ata madje kishin diskutuar edhe për martesë. Ai i kishte kërkuar gruas nga Moldova vetëm një gjë: besnikëri absolute.

“Duhet ta kuptosh që po të bëhesh një herë e imja, do të jesh përherë e imja”, thuhej në njërin nga shumë mesazhe të cilat Tate ia kishte dërguar gruas më 4 shkurt të vitit të kaluar përmes WhatsAppit, e që është cituar nga prokurorët të cilët pretendojnë se ai ka trafikuar dhe i ka ekspozuar seksualisht dhjetëra gra.

Tate, një influencues me miliona ndjekës në rrjetet sociale, i kishte kërkuar gruas nga Moldova që ta shoqëronte në Romani.

“Asgjë e keq s’do të ndodhë. Por ti duhet të jesh në anën time”, citohet një mesazh tjetër i dërguar nga ai më 9 shkurt po të vitit të kaluar.

Sipas prokurorëve rumunë, Tate e kishte përdhunuar dy herë gruan, derisa po mundohej që ta përfshinte në një operacion të trafikimit human, i fokusuar në pornografinë për një platformë online, e cila ua mundëson njerëzve që të shesin video të tyre eksplicite.

Të gjitha këto të dhëna janë përfshirë në një dokument të papublikuar të një gjykate në Bukuresht të Rumanisë, i përbërë nga 61 faqe, i cili është siguruar nga Reuters, transmeton Koha.net.

Ish-kampioni i botës në kikboks, Andrew Tate dhe vëllai i tij, Tristan po mbahen në paraburgim në Rumani, që nga arrestimi i tyre më 29 dhjetor të vitit të kaluar.

Andrew Tate, 36 vjeç dhe vëllai i tij 34 vjeç i kanë mohuar të gjitha akuzat ndaj tyre.

“Vëllezërit e kanë përdorur mashtrimin dhe frikësimin për t’i vënë gjashtë gra nën kontrollin e tyre dhe për t’i transferuar ato në skllave”, thonë prokurorët në dokumentin që ka siguruar Reutersi.

Avokati i tyre, Eugen Vidineac, ka deklaruar se viktimat e pretenduara të vëllezërve nuk janë keqtrajtuar, por “kanë jetuar nën mbështetjen e të famshmëve Tate”, sipas dokumentit.

“Ato ishin të kënaqura dhe askush nuk i ka detyruar që t’i bëjnë këto gjëra”, ka shtuar Vidineac.

Sipas tij, Andrew Tate dhe gruaja nga Moldavia për të cilën flitet në dokumentin e gjykatës, kanë pasur marrëdhënie seksuale, por që gjithçka ishte bërë me pëlqimin e të dyja palëve. Ai e ka akuzuar gruan për fabrikim të deklaratave të përdhunimit.

Imazhi i Andrew Tate është krijuar nga një sërë komentesh të diskutueshme. Ai i ka krahasuar gratë me qentë dhe ka deklaruar se ato kanë një pjesë të përgjegjësisë për të qenit të dhunuara. Këto deklarata që ai ka lëshuar herë pas here kanë bërë që ai të përjashtohet nga rrjetet sociale si Facebook, Instagram dhe shumë të tjera.

Vetëm në Twitter, llogaria e Tates është rikthyer, gjë që ka ndodhur pasi platformën e bleu miliarderi, Elon Musk.

Prokurorët rumunë kanë thënë se në kuadër të hetimeve ndaj dy të dyshuarve Tate dhe dy grave të cilat akuzohen se kanë punuar për ta, kanë sekuestruar asete në vlerë prej rreth 4 milionë dollarësh.