Shtetet e Bashkuara të Amerikës kanë sanksionuar një kompani kineze për gjoja sigurimin e imazheve satelitore të Ukrainës për të mbështetur operacionet luftarake të grupit mercenar Wagner për Rusinë.
Instituti i Kërkimeve të Shkencës dhe Teknologjisë Hapësinore “Changsha Tianyi” është në mesin e 16 enteve të goditura me sanksione nga Departamenti i Thesarit, ka raportuar BBC-ja të premten.
Firma, e njohur gjithashtu si Spacety China, ka zyra në Pekin dhe Luksemburg.
Wagner furnizon Rusinë me mijëra luftëtarë në luftën në Ukrainë.
Spacety China i kishte ofruar Terra Tech, një firme teknologjike me bazë në Rusi, imazhe satelitore të radarit me hapje sintetike (SAR) të vendndodhjeve në Ukrainë, tha në një deklaratë të enjten Zyra e Kontrollit të Pasurive të Huaja e Departamentit të Thesarit të SHBA-së.
"Këto imazhe u mblodhën për të mundësuar operacionet luftarake të Wagnerit në Ukrainë”, ka thënë ai.
Departamenti ka sanksionuar gjithashtu filialin e Spacety me bazë në Luksemburg.
Sipas sanksioneve, nuk mund të ketë transferim, pagesë ose eksport të ndonjë prone ose interesi në Shtetet e Bashkuara tek subjektet e synuara.
Kina, një aleate e ngushtë e Rusisë, është përpjekur të pozicionohet si një palë neutrale në lidhje me luftën në Ukrainë. Ajo është kritikuar nga SHBA-ja dhe aleatët e saj për refuzimin për të dënuar pushtimin e Rusisë në Ukrainë.
