Botë

Superjahti i sekuestruar rus 75 milionë dollarësh do të vihet në ankand

Një superjaht rus me vlerë 75 milionë dollarë do të hidhet në ankand pasi pronari i tij u sanksionua.

Superjahti “Axioma” u sekuestrua në Gjibraltar në mars, pasi banka amerikane JP Morgan pretendoi se pronari Dmitrievich Pumpyansky nuk pagoi një hua prej 20 milion dollarësh, raportoi BBC-ja të shtunën.

Anija 72.5 milionëshe do të dalë në ankand të martën dhe, për shkak se është e listuar vetëm për një ditë, pritet të shitet për më pak se vlera e parashikuar.

Superjahti mund të akomodojë për fjetje 12 persona, në gjashtë kabina.

Anija ka po ashtu një pishinë, xhakuzi, spa, kinema 3D, ski jet dhe pajisje zhytjeje, dhe ka hapësirë ​​për 20 anëtarë të ekuipazhit.

Është varka e parë luksoze e kapur që shitet që kur u vendosën kufizime ndaj rusëve të fuqishëm, pas pushtimit të Ukrainës nga Moska në shkurt.

Ka pasur thirrje nga disa qeveri, përfshirë Mbretërinë e Bashkuar, që të ardhurat nga asetet e sekuestruara të dërgohen për të ndihmuar refugjatët ukrainas.

Megjithatë, paratë nga shitja e “Axioma” pritet të shkojnë për JP Morgan, pas ankandit nga Gjykata e Admiralitetit të Gjibraltarit.

Edhe pse në pronësi të Pumpyansky, anija e cila fillimisht quhej Sheshi i Kuq, kur u ndërtua në vitin 2013, ishte në dispozicion për milionerët, për t'u marrë me qira deri në 549,000 euro në javë, plus shpenzimet.