-
Nga:
Enver Robelli
- 8 dhjetor 2021 17:12
- Shpërndaje në:
MINISTRE E JASHTME: Annalena Baerbock
Për herë të parë të Gjelbrit morën ministrinë e Jashtme gjermane në vitin 1998. Atëherë në Kosovë mbretëronte luftë dhe ministri i ri Joschka Fischer, ndonëse vinte nga një parti pacifiste, ndoqi një politikë të qartë transatlantike dhe proamerikane, duke përkrahur ndërhyrjen e NATO-se për çlirimin e Kosovës nga sundimi kriminal serb. Me Annalena Baerbock të Gjelbrit “pushtojnë” ministrinë prestigjioze për herë të dytë – dhe për herë të parë në historinë e Gjermanisë një grua do të jetë ministre e jashtme. Baerbock ishte kandidate e të Gjelbërve për kancelare, por partia e saj doli e treta në zgjedhje – edhe për shkak se para fushatës elektorale u zbulua se Baerbock e kishte stolisur një libër të sajin me disa paragrafë pagjiaturë. Baerbock (bashkë me Robert Habeck) është shefe e partisë që nga viti 2018. Baerbock u lind më 1980 në Hannover, është politologe, me një master nga London School of Economics (LSE). I përket krahut realist të të Gjelbërve dhe është kritike ndaj shteteve autokratike si Rusia dhe Kina.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoMINISTRE E MBROJTJES – Christine Lambrecht
Lambrecht është socialdemokrate, në zgjedhjet e kaluara nuk kandidoi për deputete, tha se dëshiron t’i kthehet profesionit të avokates. Por me fitoren e socialdemokratëve ambiciet e saj u rritën. Ajo do të jetë pasardhëse e Annegret Kram-Karrenbauer nga partia konservatore CDU dhe kësisoj gruaja e dytë që drejton resorin e mbrojtjes.
MINISTËR I FINANCAVE: Christian Lindner
Ruajtës i arkës gjermane do të jetë Christian Lindner. Ai është shef i partisë liberale FDP. Para 4 viteve ai kishte zgjedhur opozitën për shkak se mendonte se partia e tij nuk do të ketë rol të rëndësishëm në qeveri.
MINSITËR I BUJQËSISË DHE USHQIMIT: Cem Özdemir
Cem Özdemir është ministri i parë me origjinë turke në qeverinë gjermane. Në fakt Özdemir rrjedh nga një familje çerkeze e Turqisë që emigroi në Gjermani. Në moshën 16-vjeçare u angazhua në partinë e Gjelbër. I përket krahut realist të partisë dhe është kritik i ashpër i presidentit turk Rexhep Taip Erdoan. Özdemir, vegjetarian, me dëshirë do të kishte marrë ndonjë post tjetër ministror, për shembull ministër i Jashtëm.
MINSITRE E BRENDSHME: Nancy Faeser
Faeser është socialdemokrate nga landi i Hessenit. Ajo do të drejtojë disa resore të rëndësishme si policinë federale, enti federal të kriminalistikës dhe shërbimin e brendshëm sekret si dhe entin federal për migracion dhe refugjatë.