Krerët e shteteve që po marrin pjesë në sesionin e Asamblesë së Përgjithshme të OKB -së në New-York dhe që nuk janë të vaksinuar duhet të kënaqen me një copë picë në rrugë.
Kështu i ngjau edhe presidentit brazilian Jair Bolsonaro, i cili nuk mund të hynte në asnjë restorant sepse nuk është i vaksinuar.
Bolsonaro, një populist i krahut të djathtë, dyshon në vaksinat anti-COVID dhe gjatë rrugës për në New-York tha se imuniteti i tij është mjaftueshëm i fortë për t’u mbrojtur kundër koronavirusit.
Ministrat në qeverinë e tij postuan një fotografi të Bolsonaros dhe bashkëpunëtorëve të tij duke ngrënë pica në një rrugë të qytetit të New-Yorkut. Mbështetësit e tij vlerësuan "thjeshtësinë" e Bolsonaros.
Në fakt, kryebashkiaku i New-Yorkut, Bill de Blasio, u ka bërë thirrje udhëheqësve botërorë që të vaksinohen para se të nisen për New-York për pjesëmarrje në sesionin e Asamblesë së Përgjithshme të OKB -së.
"Nëse nuk doni të vaksinoheni, as mos ejani", tha kryebashkiaku de Blasio.
Kryesuesi i Asamblesë së Përgjithshme të OKB -së, Abdulla Shahid, tha se për presidentët, kryeministrat dhe diplomatët e 193 vendeve anëtare zbatohet një sistem i veçantë, që do të thotë se ata nuk janë të detyruar të tregojnë dëshmi të imunizimit.
Sesioni u hap të martën pikërisht nga presidenti brazilian Bolsonaro.
-
21 shtator 2021 20:18
-
Shpërndaje në: