Botë

Tensione në rritje në Mal të Zi

Qindra protestues janë përplasur me policinë në Cetinë të Malit të Zi në lidhje me inaugurimin e Mitropolitit të Kishës Ortodokse serbe në Mal të Zi, Joanikije.

Ceremonia e planifikuar për të dielën kryeqytetin e dikurshëm malazez, ka ngjallur pakënaqësi te kundërshtarët e Kishës serbe.

Protestuesit të shtunën hoqën rrethojat përreth manastirit në të cilin pritet të bëhet inaugurimi i mitropolitit Joanikie.

Teksa kanë hequr rrethojat, protestuesit në hyrje të qytetit Cetinë kanë bërtitur “Këtu është Mali i Zi” dhe “Kjo nuk është Serbi!”.

Malazezët janë shumë të ndarë në lidhje me marrëdhëniet me Serbinë dhe Kishën ortodokse Serbe. Më shumë se 30 për qind e popullsisë në Mal të Zi deklarohen serbë.

Prej muajit gusht, protestuesit në Cetinë kanë kërkuar që inaugurimi të mbahet në ndonjë qytet tjetër. Kisha ka refuzuar ndryshimin e planeve.

Që prej shpalljes së pavarësisë së Malit të Zi nga Serbia më 2006 malazezët pro-pavarësisë kanë bërë thirrje për formimin e një Kishe Ortodokse të ndarë nga ajo serbe.

Autoritetet malazeze kanë bërë thirrje për qetësi gjatë ceremonisë që ka filluar të shtunën mbrëma me ardhjen e të parit të Kishës Ortodokse Serbe, Patriarkut Profirije në Podgoricë.

Porfirije pritet të marrë pjesë në inaugurimin e Joanikijes që do të jetë pasardhës i liderit të Kishës Ortodokse të Malit të Zi, Amfilohije. Ai vdiq në muajin tetor të vitit 2020 pasi u infektua me koronavirus.

Kisha Ortodokse Serbe luajti rol vendimtar në protestat e vitit të kaluar që ndihmuan në rrëzimin nga pushteti të qeverisë pro-Perëndimit në Malin e Zi. Qeveria e re malazeze tani ka në përbërje parti përkrahëse të Serbisë dhe të Rusisë.

Përgatiti: Gent Mehmeti