Trepça është duke udhëhequr ndaj Sigal Prishtinës pas çerekut të parë në gjysmëfinalen kthyese të Kupës së Kosovës në basketboll.
Mitrovicasit dhjetë minutëshin e parë ndaj prishtinasve në palestrën e stërmbushur në “Minatori”, e kanë fituar me rezultatin 22:21.
Ndeshja e parë gjysmëfinale e zhvilluar më 15 janar në palestrën “1 Tetori” në Prishtinë, ishte mbyllur me rezultatin 67:65, në të mirë të Sigal Prishtinës.
Një javë më pas, Prishtina e mposhti në “Minatori” skuadrën e Trepçës 88:86, në kuadër të xhiros së 18-të të elitës së basketbollit kosovar.
Trepça në finale të Kupës, fiton thellë ndaj Prishtinës
Trepça është finalistja e parë e Kupës së Kosovës në basketboll. Në gjysmëfinale, Trepça e eliminoi rivalen e madhe, Sigal Prishtinën. Gjysmëfinalja u zhvillua në dy ndeshje, ndërsa në ndeshjen e kthimit mitrovicasit fituan thellë, me rezultat 84:66.
Ndeshja Trepça – Sigal Prishtina u zhvillua të mërkurën mbrëma në palestrën “Minatori” në Mitrovicë. Palestra buzë lumit Ibër ishte e mbushur me shikues, ndërsa përkrahja për skuadrën vendase ishte e madhe. Presioni për ekipin mysafir po ashtu. Në çerekun e tretë ndeshja u ndërpre për pak minuta, deri në largimin e një pjese të shikuesve nga tribuna VIP.
Trepça është fituese në fuqi e Kupës së Kosovës, ndërsa në finale takohet me fituesin e gjysmëfinales tjetër mes Bashkimit e Vëllaznimit. Ndeshja e dytë mes këtyre dy skuadrave luhet të enjten prej orës 18:30.
Çereku i parë i ndeshjes mes Trepçës e Prishtinës ishte i barabartë, 22:21. “Xehetarët” shkëputjen e nisën menjëherë në fillim të çerekut të dytë të cilin e fituar 21:15. Pas pjesës së parë rezultati ishte 43:36 për vendasit.
Dallimi u bë sidomos në çerekun e tretë, të cilin Trepça e fitoi 26:16. Në këtë çerek shpërtheu Mikaile Tmushiq me disa treshe rresht.
Ndërkohë çereku i katërt ishte sërish i barabartë dhe kështu Trepça e mbajti epërsinë e lartë të krijuar sidomos në çerekun e tretë.
Te Trepça më i miri ishte Mikaile Tmushiq me 23 pikë. Ai i kishte edhe pesë kërcime. Tekele Cotton realizoi 15 pikë e pesë kërcime, ndërsa Michael Myers i realizoi 11 pikë e katër kërcime. Kontribuoi edhe fundi tjetër amerikan, Malik Johnson me 13 pikë, shtatë asistime e katër kërcime.
Donte Clark i kishte statistikat më të mira te Sigal Prishtina. Ai ndeshjen e përfundoi me 10 pikë, nëntë kërcime e katër asistime. Rashid Mahalbashiq i kishte 14 pikë e nëntë kërcime, por edhe pesë topa të humbur e shumë gjuajtje jo të sakta. Josh Nzeakor i realizoi 13 pikë, tri kërcime e tri asistime, ndërsa Muhamedali Janjeva kontribuoi me 15 pikë e katër kërcime, që megjithatë nuk mjaftuan.
Kjo ishte ndeshja e tretë brenda një kohe të shkurtër mes Trepçës e Prishtinës. Dy ndeshjet e kaluara i fitoi skuadra prishtinase me rezultat të ngushtë. Por të mërkurën dominuan “xehetarët” dhe siguruan një tjetër finale. Mitrovicasit i kanë luajtur të gjitha finalet në vitet e fundit. Vjet i fituan të gjitha po ashtu.
Vazhdon ndeshja në Mitrovicë
Ka vazhduar ndeshja mes Trepçës e Sigal Prishtinës.
Janë larguar vetëm një pjesë e shikuesve nga tribunat VIP.
Ndërpritet ndeshja në Mitrovicë
Është ndërprerë ndeshja mes Trepçës dhe Sigal Prishtinës.
Në mesin e çerekut të tretë, arbitrat kanë larguar lojtarët nga parketi.
Pas një fauli në sulm që iu dha një lojtari të Prishtinës, ai reagoi dhe u ndëshkua me gabim josportiv.
Ndërkohë nga shikuesit në parket ka pasur të tillë që kanë tentuar të cenojnë fushën e lojës.
Kjo edhe solli ndërprerjen. Ka gjasa që të largohen tifozët nga tribunat.
Trepça në epërsi prej shtatë pikësh pas pjesës së parë
Trepça po udhëheqë 43:36 ndaj Sigal Prishtinës në ndeshjen e dytë gjysmëfinale të Kupës së Kosovës në basketboll.
Ndeshja po zhvillohet në “Minatorin” e stërmbushur.
Çereku i parë përfundoi 22:21 për vendasit, ndërsa i dyti 21:15.
Prishtina e ka fituar ndeshjen e parë me dy pikë dallim.