-
Nga:
Arsim Maxhera
- 30 gusht 2025 11:13
- Shpërndaje në:
Një paraqitje e shkëlqyer e yllit të Finlandës, Lauri Markkanen, ndaj Britanisë së Madhe, ka bërë që Shqipëria të përmendet si pjesë e historisë së Kampionatit Evropian të basketbollit, të njohur si Eurobasket.
Markkanen të premten shkëlqeu, duke i realizuar plot 43 pikë në fitoren e Finlandës ndaj Britanisë së Madhe. Ai 43 pikë i kishte shënuar edhe në një ndeshje të Eurobasketit 2022 dhe tani prezantohet dy herë në dhjetëshen e koshashënuesve më të mirë në histori të Eurobasketit. Në fakt, në gjashtë raste janë shënuar nga 43 pikë në një ndeshje të Eurobasketit, që mjaftojnë për vendin e dhjetë. Në pesë raste janë shënuar nga 44 pikë, që mjaftojnë për vendin e pestë në ranglistë.
Nikos Galis i Greqisë e mban vendin e tretë me 46 pikë dhe vendin e katërt me 45 pikë. Ylli slloven, Luka Donçiq, është i dyti në listë me 47 pikët që i shënoi ndaj Francës në Eurobasket 2022. Dhe pa konkurrencë në vendin e parë qëndron Eddy Terrace i Belgjikës. Ai në vitin 1957, në Bullgari i shënoi plot 63 pikë në ndeshjen ndaj Shqipërisë.
Pos për nivelin e Terrace, rekordi dëshmon edhe për praninë e Shqipërisë në Eurobasket dhe paraqitjen e zbehtë të saj.
Belgjika e kishte fituar ndeshjen ndaj Shqipërisë në vitin 1957 me rezultatin 90:48. Ndeshja ishte e vlefshme për plasman përfundimtar. Shqipëria kishte përfunduar e 16-ta prej 16 ekipeve përfaqësuese.
I kishte humbur të gjitha dhjetë ndeshjet.
Në fazën grupore kishte pësuar nga Jugosllavia me 89:57, nga Çekosllovakia me 71:37 dhe nga Skocia me 65:42.
Më pas humbi edhe nga Skocia, 69:56, Gjermania Perëndimore, 72:43, Finlanda, 91:42, Italia, 82:42, Turqia, 97:64, Austria, 58:45 dhe Belgjika, 90:48.
Kjo ishte paraqitja e dytë dhe e fundit e Shqipërisë në Eurobasket. Ende pjesëmarrja ishte pa kualifikime.
Në ngjarjen kontinentale, Shqipëria debutoi në vitin 1947, në Pragë. Në fazën grupore humbi nga Italia me rezultat 60:15, nga Belgjika me rezultat 114:11 dhe nga Egjipti me shifrat 104:19. Humbi më pas edhe nga Rumania, Austria dhe Jugosllavia për t’u renditur e 14-ta prej 14 ekipeve pjesëmarrëse.
Kualifikimet në Eurobasket janë prezantuar në vitet tetëdhjeta, ndërsa Shqipëria më asnjëherë nuk u paraqit në ngjarje. Aktualisht është shumë larg kualifikimit, njëjtë si Kosova.
Kalimi i rekordit të vendosur në ndeshjen ndaj Shqipërisë duket pak i mundur, ndonëse në Eurobasket 2025 po paraqiten të gjitha yjet e basketbollit evropian, shumë prej tyre yje edhe në NBA.