BMW-ja pret të ketë më shumë shitje këtë vit në Kinë

Kompania gjermane e automjeteve, BMW, pret të shesë më shumë vetura në Kinë këtë vit pavarësisht luftës së çmimeve në segmentin e automjeteve elektrike, ka thënë shefi financiar i prodhuesit të veturave luksoze në ekspozitën e veturave IAA në Mynih, raportoi të dielën Reuters.

Në intervistën e tij të parë që kur u bë shef i financave në maj, Walter Mertl ka thënë se BMW-ja ka qenë në gjendje të rritej 3.7% në Kinë në gjysmën e parë të vitit, më shpejt se tregu më i mirë i automjeteve në botë në tërësi, dhe tha se pret që ky trend të vazhdojë.

"Ne po supozojmë dhe po e shohim këtë për momentin, se do të shesim më shumë këtë vit se vitin e kaluar", tha Mertl, duke shtuar se lufta e çmimeve po ndikon kryesisht në segmentet më të lira të tregut të automjeteve, ku BMW-ja nuk është aktive.

Shitjet e automjeteve në Kinë ranë për të dytin muaj në korrik, pasi zbritjet dhe masat e mbështetjes së qeverisë nuk arritën të joshin konsumatorët për blerjen e veturave.

BMW-ja së fundmi ngriti perspektivën e saj për vitin 2023 për shitjet e automjeteve në grup dhe tha se pret rritje solide, e cila përcaktohet si diku midis 5% dhe 9.9%.