Kompania britanike “Scrap Car Comparison” vendosi për një hulumtim interesant në bashkëpunim me kompaninë konsulente londineze “Censuswide”. Në bazë të analizës me shoferë të Britanisë së Madhe, u konstatua se cilat vetura drejtohen nga shoferët më inteligjentë, shkruan The Sun. Gjithsej 27 marka veturash u përfshin në hulumtim. Koeficienti i inteligjencës (IQ) është një vlerësim standard i performancës intelektuale të çdo individi.
Konsiderohet se dy të tretat e popullsisë kanë një nivel ndërmjet 85 dhe 115 pikë. U zbulua gjithashtu se vetëm 2.5% e njerëzve janë jashtë normës, ose për shkak të një rezultati nën 70 ose, në ekstremin tjetër, për shkak të një rezultati mbi 130.
Përveç kësaj, një pakicë e vogël që kanë një IQ më të lartë se 144 i përkasin grupit të njerëzve që konsiderohen të talentuar, sipas të njëjtës shkallë të inteligjencës Stanford-Binet.
Pas vlerësimit të pjesëmarrësve në hulumtim, ata u klasifikuan sipas markës së veturës që zotërojnë.
Hulumtimi i kryer nga “Scrap Car Comparison” tregoi se shoferët me IQ më të lartë, me një rezultat mesatar prej 99, zotërojnë vetura Skoda.
Pas Skodas, pasojnë pronarët e Suzukit (98.09), Peugeotit (97.79), Mini-Cooperit (97.41) dhe Mazdas (95.91).
Në anën tjetër, drejtuesit e Land Roverit (88.58), Fiatit (90.14) dhe BMW-së (91.68) kishin IQ më të ulët.
Megjithatë, analiza zbulon se i gjithë grupi i të anketuarve ishte brenda asaj që konsiderohet si rezultat mesatar, midis 85 dhe 115 në shkallën e IQ.
Studimi po ashtu thekson se shoferët më inteligjentë preferojnë veturat me benzinë, gjë që përfaqëson një paradoks në mes të procesit të elektrifikimit.
Veturat me benzinë drejtohen nga njerëz me IQ të lartë (94.35), të ndjekur nga pronarët e versioneve me motorë hibridë (93.89) dhe motorë me naftë (92.91).
Drejtuesit e veturave elektrike janë vetëm në vendin e katërt (90.19). Gjithashtu, shoferët më inteligjentë pëlqejnë më shumë ngjyrën e bardhë të veturës, e ndjekur nga e gjelbër dhe e kuqja.
© KOHA. Të gjitha të drejtat janë të rezervuara.
