Humanisti nga Ferizaj, Agon Zhinipotoku, është përlotur në studion e emisionin “SOT” në KTV, teksa ka kujtuar iftaret që ka kaluar me gruan, të cilës i kanë vdekur shtatë fëmijët dhe burri.
Duke mos treguar për rrethanat e vdekjes së anëtarëve të kësaj familjeje, Zhinipotoku e veçoi këtë rast nga të gjithë të tjerët që takoi gjatë muajit të Ramazanit.
Duke komentuar disa nga fotografitë që i ka shkrepur në familjet të cilave si pjesë e shoqatës bamirëse “Jetimat e Ballkanit” u ka dalë në ndihmë, Zhinipotoku veçoi gruan, që përveç vdekjes së më të afërmve të saj, përballet edhe me kancer të gjirit.
“Ky është rasti që e kam më për zemër dhe në fakt merremi që tri vjet me të. Është një nënë me kancer gjiri, e cila i ka shtatë fëmijë të vdekur dhe burrin. Që tri vjet vjen në Prishtinë për terapi, e kalojmë shumicën e kohës bashkë, gjatë 30 iftareve jemi munduar t’i rrimë afër çdo ditë”, ka thënë Zhinipotoku.
Ai ka përmendur edhe një rast tjetër. Bëhet fjalë për katër fëmijë jetimë, të cilëve u është ndërtuar shtëpia e re për shkak të kushteve të vështira ekonomike.
“Edhe ky ka qenë një rast i prekshëm. Katër jetimë kur bëhen me shtëpi të re dhe më lusin që në Natën e Kadrit të hyjnë në shtëpinë e re për ta ngrënë iftarin. Përkundër kësaj ne po synojmë që të jemi shumë më afër qytetarëve në nevojë”, ka thënë Zhinipotoku.
