Njohësi i procesit të dialogut, Visar Xani, ka thënë se në Planin evropian nuk e paraqet Asociacionin e komunave me shumicë serbe me vendime ligjore dhe se sipas tij nuk ka ndonjë rrezik për autonomi në veri të Kosovës.
I ftuar të martën në “60 Minuta” të KTV-së, Xani ka thënë se nuk është e mundur të ndodhë që Asociacioni të ketë kompetencë kushtetuese ekzekutive.
“Ka vrojtim dhe rekomandim, nuk ka kompetenca ekzekutive, nuk ka vendime që ai Asociacion i ka ligjore që mund të merren dhe nuk konsideroj që është ndonjë rrezik për autonominë në atë pjesë. Duhet ta kemi parasysh që moskontrolli i plotë në atë pjesë çdo herë është rrezik potencial, por si Asociacion që jep vendim kushtetues dhe kompetencë kushtetuese ekzekutive, është e pamundshme të ndodhë”, është shprehur ai.
Xani më tej ka thënë se tashmë është kuptuar që Asociacioni “ nuk është një tradhti, nuk është Republika Sërpska, por është një avancim për vrojtim nga minoriteti serb të projekteve në interes të tyre”.
Sipas tij, çdo rishikim i marrëveshjes për të cilën janë pajtuar palët të hënën në Bruksel, do të kishte pasoja në kohë dhe në kërkesat për kompromis.
“Këtu çka mungon është vetëm njohja formale, ajo letra që është maksimumi i mundshëm tani për tani. Ende Serbia nuk është gati, edhe më herët ka pasur presione ta njohë pavarësinë e Kosovës, por s’ka qenë gati dhe mendoj që do të duhej një fazë tjetër që e vë para aktit të kryer Serbinë, siç është anëtarësimi në BE që do të duhej të ketë kusht që të ketë njohje reciproke mes Kosovës dhe Serbisë e më pas të finalizohej me anëtarësim të plotë”, ka thënë tutje ai.
Xani ka thënë se është e rëndësishme që me këtë marrëveshje Kosovës i lejohet anëtarësimi në NATO, me të cilin sipas tij, është më garantues sovraniteti dhe siguria e vendit, sesa anëtarësimi në Organizatën e Kombeve të Bashkuara.