Lëvizja Vetëvendosje ka thënë se shqiptarët duhet të faktorizohen në Ballkan për të balancuar Serbinë. Në një reagim pas bashkimit të forcave opozitare pro-serbe në Mal të Zi për të bërë koalicionin e ri qeverisës, Lëvizja Vetëvendosje ka thënë se në Mal të Zi bashkëjetesa ndëretnike do të pamundësohet “dhe shqiptarët duhet të mendojnë për orientime të reja”.
Duke reaguar për “hovin e hegjemonizmit serb”, Vetëvendosje ka thënë se Kosova e Shqipëria duhet të bëjnë bashkim ekonomik e jo të “vrapojnë pas Vuçiqit për Mini-Schengen Ballkanik”.
“Që nga zgjedhjet e fundit të mbajtura para dy muajve, 3/4 e Kuvendit të Serbisë është në duart e Vuçiqit. Presidenti, kryeministri dhe kryetari i Kuvendit atje janë nga e njëjta parti politike. Serbia nuk është shtet demokratik. Homogjenizimi nacional i elektoratit serb është fort i ngjashëm me atë nga fundi i viteve ’80. Ky homogjenizim me pushtet autoritar, frymë religjioze dhe përmbajtje ultra-konservatore po përkthehet në hegjemonizëm rajonal. Federata Ruse është përcaktuar për serbët si satelit të saj në Ballkan, andaj situata politike ngjan më shumë si ajo në prag të Luftës së Parë Ballkanike sesa si ajo pas Paqes së Shën Stefanit. NATO-ja dhe BE-ja nuk bën t’i ngjajnë Perandorisë Osmane në dekadën e saj të fundit. Ato nuk guxojnë të mjaftohen me paqen dhe sigurinë në Maqedoninë e Veriut, duke e reduktuar aty krejt paqen dhe sigurinë rajonale. Shqiptarët duhet të faktorizohen për ta balancuar Serbinë. Nuk mund të ecim në shekullin XXI me këto shtetet tona të dobëta që udhëhiqen nga politikanë karagjozë e të korruptuar. Ata nuk gëzojnë autoritet dhe besim te shqiptarët, andaj ishte e kotë, në mos kundër-produktive, thirrja e tyre e përsëritur për të votuar në Mal të Zi njërin koalicion shqiptar. Kosova e Shqipëria duhet ta bëjnë bashkimin ekonomik dhe ta unifikojnë politikën e jashtme e të sigurisë, dhe jo të vrapojnë pas Vuçiqit për Mini-Schengen Ballkanik apo për njohje me ‘Zajednicë’”, thuhet në reagim të VV-së.
Tutje kjo parti ka thënë se shqiptarëve u duhet një Aleancë Ballkanike “që të ruajmë paqen”.
“Në fillim të shekullit XX, Rusia cariste synonte një Aleancë Ballkanike kundër perandorive Austro-hungareze dhe Osmane. Këto dy perandori nuk ekzistojnë më. Shqiptarët atëbotë bënë më së shumti rezistencë dhe organizuan më së shumti kryengritje por ngelën me një shtet që nuk përthekonte as një të tretën e trojeve të cilat asokohe banoheshin prej kombit tonë. Një shekull më vonë, e në prag të dekadës së tretë të shekullit XXI, na nevojitet një Aleancë Ballkanike, por kësaj radhe përballë hegjemonizmit të Serbisë dhe imperializmit të Rusisë. Ne shqiptarët jemi në qendër. Në njërin krah kemi kroatët e në tjetrin bullgarët. Bashkë me ta, por edhe me Sarajevën, Podgoricën dhe Shkupin zyrtar, mund e duhet ta krijojmë Aleancën 3+3, që të ruajmë paqen, të fitojmë Evropën e të forcojmë NATO-n, që të mos e harrojmë shekullin e kaluar e që të mos gabojmë në këtë shekull, pa inat ndaj të tjerëve e për hir të vetes tonë”, përfundon reagimi i VV-së.
Të dielën në Mal të Zi, partia e presidentit Milo Gjukanoviqit kishte fituar në zgjedhje, por me shumë pak dallim nga partitë opozitare. Tri parti opozitare u bashkuan për të njoftuar se do të formojnë vetë qeverinë e re të Malit të Zi. Bashkimi i këtyre forcave ka nxitur reagime të ndryshme në Mal të Zi. Madje pati edhe përplasje mes mbështetësve të dy krahëve.
