Vuçiqi takohet me Sarrazinin, bisedojnë për dialogun Kosovë – Serbi

Presidenti i Serbisë, Aleksandar Vuçiq, është takuar me Përfaqësuesin Special të Gjermanisë për Ballkanin Perëndimor, Manuel Sarrazin.

Presidenca e Serbisë ka thënë se temë e takimit ka qenë edhe dialogu Kosovë – Serbi.

“Presidenti theksoi se pret mbështetje konstruktive për dialogun dhe gjetjen e një zgjidhjeje kompromisi që do të mundësonte stabilitet të qëndrueshëm në rajon, duke u bazuar marrëveshjet ekzistuese dhe mbi të gjitha themelimin e Asociacionit të Komunave me shumicë Serbe, gjë që nuk është bërë për nëntë vjet”, thuhet nga Presidenca e Serbisë.

E Vuçiq ka folur edhe për bashkëpunimin rajonal, duke përmendur Ballkanin e Hapur.

“Serbia është e angazhuar fuqishëm në të gjitha aktivitetet e organizuara në kuadër të Procesit të Berlinit dhe nisma e Ballkanit të Hapur është një tjetër qasje proaktive e vendit tonë për integrim rajonal”, tha Vuçiq.

Sipas Presidencës së Serbisë, Sarrazin, ka thënë se politika e zgjerimit dhe puna e forcimit të bashkëpunimit mes vendeve të Ballkanit Perëndimor do të jetë prioritet i Gjermanisë në vitet e ardhshme.