-
Nga:
Fitim Gashi
- 20 shtator 2022 12:46
- Shpërndaje në:
Sindikata e Bashkuar e Arsimit, Shkencës dhe Kulturës, ka njoftuar se nga 22 mijë e 585 mësimdhënës, vetëm 0.4 për qind prej tyre nuk janë përfshirë në grevën e përgjithshme.
KOHA ka siguruar njoftimin që SBASHK-u ua ka përcjell krerëve sindikalë të komunave të Kosovës të hënën, ku bëhet e ditur se Bashkimi i Sindikatave të Pavarura të Kosovës ka dërguar shkresë tek Avokati i Popullit.
BSPK-ja ka kërkuar që rritja e pagës nga shtatori të jetë për 9.5 për qind dhe shtesa prej 50 eurove të jepet deri në dhjetor, kurse nga muaji janari i vitit 2023, të ketë rritje të pagës aq sa ka rritje ekonomike. BSPK-ja kërkoi që të merren parasysh edhe vërejtjet e sindikatave mbi Ligjin e Pagave si dhe në Ligjin e Zyrtarëve publikë.
“2. Ligji i skemave pensionale të financuara nga shteti të bëhet plotësim-ndryshimi duke eliminuar kërkesën e 15 vjetëve si kontributdhënës para vitit 1990, gjegjësisht 1999 për arsimin. Deri në fund të nëntorit 2022. 3. Deri në fund të vitit 2022 të miratohet plotësim-ndryshimi i Ligjit të sigurimeve shëndetësore ose në të kundërtën të fillojë zbatimi i Ligjit aktual të sigurimeve shëndetësore nga janari i vitit 2022”, thuhet në kërkesat e parashtruara nga BSPK-ja për Avokatin e Popullit.
Ndërsa, SBASHK-u tha se kërkesat pritet të realizohen me ndërmjetësimin e Avokatit, duke përfshirë edhe ndërmjetësimin e drejtoreshës së Unionit të Sindikatave Evropiane të Arsimit, Susan Flocken. Takimi i Flocken me kryeministrin, sipas SBASHK-ut, pritet të zhvillohet të mërkurën.
Nga të dhënat e fundit, del se në vitin shkollor 2020/21 ishin 22.585 mësimdhënës në sistemin publik, e 0.4 për qind e kësaj shifre i bie të jetë 90.
Edhe
SBASHK-u propozon që të mos ketë kthim në grevë
Pra rreth 90 mësimdhënës kanë ndërprerë grevën në disa shkolla apo në 1.5 për qind të shkollave në nivel vendi.
Mësimdhënësit së bashku me punonjësit e administratës publike kanë hyrë në grevë nga 25 gushti me kërkesën që deri në miratimin e Ligjit të pagave t’u ndahen nga 100 euro shtesë në muaj.
Qeveria ka ofruar për tre muaj nga 50 euro, por kjo ofertë nuk është pranuar.
