Kryetari i Kuvendit të Republikës së Kosovës, Kadri Veseli, në kuadër të vizitës në Slloveni, ku po merr pjesë në takimet e SEECP-së, është pritur paraprakisht në një takim të veçantë nga kryetari i Kuvendit të Sllovenisë, Milan Brglez.
Sipas njoftimit për media të Kuvendit të Kosovës, në këtë takim, të dy homologët diskutuan për bashkëpunimin ndërshtetëror midis Kosovës dhe Sllovenisë në të gjitha fushat, veçanërisht në rrafshin ekonomik, si dhe për forcimin e marrëdhënieve midis dy parlamenteve.
“Kryeparlamentari slloven e siguroi kryetarin Veseli për mbështetjen e plotë të Sllovenisë në rrugën e integrimit euro-atlantik të Kosovës dhe në procesin për liberalizimin e vizave. Ishte konkludim i përbashkët se perspektiva euro-atlantike është rruga më e mirë e bashkëpunimit, për të fuqizuar demokracinë, stabilitetin, paqen, sigurinë dhe bashkëpunimin regjional”, thuhet në njoftimin për media.
Sipas këtij njoftimit, Brglez përgëzoi kryetarin Veseli për ratifikimin e marrëveshjes së demarkacionit me Malin e Zi, si një hap i madh në ecjen përpara.
“Në takim u diskutua edhe kërkesa e kryetarit Veseli që Kosova të kryesojë SEECP-në në periudhën kohore 2019/2020”, thuhet në njoftim.
Kosova shprehu interes për marrjen e Kryesimit të Komisionit të Përgjithshëm për Ekonomi, Infrastrukturë dhe Energji, por u kundërshtua nga Serbia. Gjatë takimit që është mbajtur dje u diskutua për stagnimin e vendimit në selinë e Sekretariatit të AP të SEECP-së dhe kërkuan mënyra për të dalë nga kjo situatë. Kësisoj, kryesimi i kaloi Turqisë. LEXO MË SHUMË!
Edhe
Veseli: Eurodeputetët mbështesin heqjen e vizave për Kosovën
Sidoqoftë, në takimin e sotëm, “kryeparlamentari Veseli falënderoi shtetin mik të Sllovenisë për mbështetjen e vazhdueshme për Kosovën në të gjitha fazat, ndërsa konsideroi se kjo përkrahje vazhdon të mbetet e nevojshme edhe në të ardhmen, në proceset të cilat Kosova i ka para vetes”.
Sipas njoftimit, Veseli çmoi shumë mundësinë që kanë institucionet e Republikës së Kosovës që të përfitojnë nga përvoja legjislative sllovene.
“Bashkëpunimi ndërparlamentar me Slloveninë, ofron mundësi të reja edhe në procesin euro-integrues”, theksoi kryetari Veseli.
