Veseli për moscertifikimin e Listës Serbe: Tentim lojë me shtetin dhe institucionet

Ish-koloneli i Forcës së Sigurisë së Kosovës, Afrim Veseli, moscertifikimin e Listës Serbe e ka quajtur tentim loje me shtetin dhe institucionet e saj nga ana e pushtetit. 

Në një lidhje direkte në emisionin “60 Minuta” të KTV-së, Veseli ka thënë se certifikimi i kësaj partie është i pashmangshëm dhe kushtetues.

“Kemi marrë kritika të shëndosha se si duhet të sillet Kosova dhe institucionet e saj. Duket se politikanët e në këtë rast partia në pushtet nuk po reflektojnë. Situatë të tillë kemi pasur edhe në zgjedhjet e kaluara, një tentim loje, thjeshtë lojë me shtetin e me institucionet e saj, kur dihet se është e pashmangshme në aspektin ligjor dhe kushtetues certifikimi i Listës Serbe”, ka thënë ai.

Veseli ka shtuar se Kosova duhet të sillet si shtet demokratik, e jo të lë përshtypjen te partnerët strategjik si vend që nuk i respekton ligjet e veta.

“Besoj se nuk ka qytetar të Kosovës se nuk e di që Lista Serbe është thjeshtë vegël e Serbisë dhe presidentit të saj Vuçiq, në Kosovë. Është destruktive. Megjithatë ne jemi shtet demokratik e ligjor dhe ashtu duhet të sillemi, andaj edhe moscertifikimi i saj ka ardhur në këtë aspekt për mosrespektim të ligjit. E gjitha ka shkuar me lojëra politike për të fituar një grusht votash, e në anën tjetër është bërë dëmi i madh sepse imazhi i Kosovës në sy të partnerit tonë strategjik dhe vendeve të tjera evropiane, është që është cenuar dhe kemi dalë si një shtet që nuk i respekton ligjet e veta”, ka thënë ai.

Thirrjen e SHBA-së lidhur me këtë çështje Veseli e ka quajtur prindërore për të cilën duhet reflektuar.