ORCA e akuzoi për mashtrime, Vela paralajmëron padi ndaj kësaj organizate

Nëpërmjet një aktiviteti protestues, Organizata për Rritjen e Cilësisë në Arsim, ORCA, ngriti akuza për tentim-kapjen e agjencive të pavarura shtetërore nga eksponentët e pushtetit. E akuzoi ish-kandidatin për anëtar të bordit të Agjencisë së Kosovës për Akreditim, Driton Vela, për mashtrim në përgatitjen akademike. Këto akuza Vela i quajti shpifje. Ai paralajmëroi padi ndaj organizatës

Me pankartat me shkrimin “Tentim-kapja e Arsimit të Lartë”, vendosur para objektit të Ministrisë së Arsimit, përfaqësues të Organizatës për Rritjen e Cilësisë në Arsim mbajtën një aksion protestues për denoncimin e asaj që e kualifikuan si tentim për kapjen e agjencive të pavarura shtetërore nga eksponentë të pushtetit.

Koordinatori i aktiviteteve të ORCA-s, Dibran Hoxha, ka thënë të jenë gjetur parregullsi në konkursin për përzgjedhjen e anëtarëve të bordit të Agjencisë së Kosovës për Akreditimi, teksa e akuzoi njërin nga ish-kandidatët për këtë pozitë, për mashtrim në përgatitjen akademike.

“Tentativa e Driton Velës për ta kapur këtë pozitë dështoi, meqë përgjatë shqyrtimit të aplikimeve, Komisioni zbuloi një fakt shokues. Driton Vela kishte tentuar ta mashtronte komisionin, duke deklaruar në CV-në e tij dhe në formularin e aplikimit se në vitin 2021 kishte qenë bartës i programit të doktoratës Mjekësi Paraklinike në Universitetin e Prishtinës, kjo e dhënë po të mos zbulohej nga komisioni vlerësues, do bënte që ai me automatizëm të rangohej më lart në listën e të rekomanduarve për anëtarë të KSHC-së”, ka thënë Hoxha.

Hoxha ka paraqitur tetë pika në të cilat pretendoi se janë gjetur mashtrime e shkelje gjatë hulumtimit të punës së Velës.

Këto akuza të Hoxhës i ka quajtur shpifje asistenti në Fakultetin e Mjekësisë, Driton Vela, duke paralajmëruar edhe padi.

Edhe Arbëri 4 gus 2023 ORCA thotë se Driton Vela ka mashtruar për punën shkencore dhe të arriturat në të kaluarën

“Të kontestohen arritjet e dikujt që është shpallur shkencëtar i vitit e që është vlerësuar prej të tjerëve... çfarë bëjnë ata, janë kapur për disa fjali të cilat i interpretojnë sipas qejfit të tyre, në mënyrë që disi të kapen për mua. P.sh. thonë që paskësha shpifur, gënjyer kur kam deklaruar që i kam përfunduar studimet e doktoratës në Shkup. A unë kurrë nuk e kam thënë këtë. Unë veç kam thënë që studimet, pjesën praktike, meqenëse këtu në Prishtinë nuk kanë ekzistuar kushtet laboratorike, i kam kryer në Shkup. Kjo është shumë e qartë edhe prej CV-së time”, ka thënë Vela.

Ministria e Arsimit e pati anuluar në qershor konkursin për përzgjedhjen e anëtarëve të bordit të Agjencisë së Kosovës për Akreditim, shkaku i disa lëshimeve të evidentuara teknike. E në korrik, Kuvendi e ka zhbllokuar vendimmarrjen në këtë Agjenci, duke e emëruar një anëtar ndërkombëtar në Këshillin Shtetëror të Cilësisë.