UNICEF-i vendos 120 karroca në sheshin Skënderbeu, bën thirrje për përfshirje më të madhe të fëmijëve me aftësi të kufizuara

120 karroca me çanta shkolle janë vendosur në sheshin Skënderbeu në Prishtinë për të bërë thirrje për përfshirje më të madhe të fëmijëve me aftësi të kufizuara.

Këtë lloj proteste e ka bërë zyra e UNICEF-it e Kosovës. Karrocat janë siguruar nga HENDIKOS-i

“Gjersa gradualishit po i kthehemi normalitetit pas gjendjes së shkaktuar nga COVID-19, zyra e UNICEF-it në Kosovë bën thirrje për vëmendje më të madhe për mbrojtjen e fëmijëve me aftësi të kufizuara në mënyrë që ata të mos lihen në karantinë për pjesën tjetër të jetës së tyre. Instalacioni i cili do të zgjasë nga data 17 deri më 25 maj është thirrje që u bëhet vendimmarrësve, shoqërisë civile, mediave dhe sektorit privat për përfshirje më të madhe të fëmijëve që jetojnë me aftësi të kufizuara”, është shkruar në komunikatë nga zyra e UNICEF-it në Kosovë.

Murat Sahin, shefi i zyrës së UNICEF-it në Kosovë ka thënë se “sipas Konventës për të Drejtat e Fëmijëve, të gjithë fëmijët, pa dallim, kanë të drejta të barabarta. Na përket neve që t’i ndihmojmë ata që të arrijnë potencialin e tyre të plotë. Është detyrim i ynë moral, ligjor dhe njerëzor”.