UNDP-ja do të vazhdojë përkrahjen për Policinë e Kosovës

U.D. Drejtori i përgjithshëm i Policisë së Kosovës (PK-së), Naim Rexha, sot ka pritur në takim zyrtar një delegacion nga UNDP-ja, të prirë nga Alessandra Roccasalvo, zëvendës përfaqësuese e përhershme e UNDP-së në Kosovë.

Përmes një komunikate për media bëhet e ditur Rexha njoftoi të pranishmit mbi angazhimet, aktivitetet dhe objektivat strategjike të Policisë së Kosovës në përmbushjen e detyrave dhe obligimeve të saja ligjore në të mirë të sigurisë dhe rendit në Republikën e Kosovës, transmeton Koha.net.

Njëkohësisht Rexha çmoi lartë angazhimin dhe bashkëpunimin e vazhdueshëm të UNDP-së në përgjithësi, e me theks të veçantë për ofrimin e ndihmës rreth projektit të shkatërrimit të armëve të vogla.

“Po ashtu në takim u diskutua edhe rreth forcimit të bashkëpunimit të mëtejmë, me ç’rast Alessandra Roccasalvo e ritheksoi se UNDP-ja do të vazhdojë përkrahjen dhe mbështetjen edhe në të ardhmen për Policinë e Kosovës”, thuhet në komunikatë.