Oda e Avokatëve ka shfuqizuar vendimin me të cilin ishte bllokuar rasti për vrasjen e Agonis Tetajt. Që nga qershori i vitit të kaluar procesi gjyqësor s’pati asnjë rezultat, pasi Oda e Avokatëve refuzonte të caktonte avokat për të akuzuarin, qëkur Besnik Berisha ishte përjashtuar si avokat i Shaban Gogajt. Vendimin, të cilin vetë e bëri publik, e ka kritikuar ashpër nënkryetari i odës, Naim Rudari. Ai e ka cilësuar shfuqizimin si dorëzim.
“Oda e Avoaktëve të Kosovës DORËZOHET para presionit, kanosjeve e hetimeve të kundërligjshme e të padrejta nga akterët e ‘Drejtësisë’ dhe shfuqizon një vendim të drejtë, të mbështetur në fakte të shumta e në një procedurë hetimore. Vendimi për mosangazhim të avokatit sipas detyrës zyrtare në rastin konkret, ishte i nevojshëm dhe i domosdoshëm për ta ndaluar fenomenin e përjashtimit të avokatit nga gjykimi që në historinë e funksionimit të organeve të drejtësisë në Kosovë ishte NJË dhe i VETMI”, ka shkruar ai në Facebook duke thënë se vendimi është marrë “për t’i bërë nder KGJK-së të cilët na kanosën në format më të papranueshme”.
Reagimi i Rudarit erdhi pak orë pasi Oda e Avokatëve njoftoi për takim të përbashkët me Këshillin Gjyqësor të Kosovës. Në njoftimin për takim u tha se u diskutua “çështja e përfaqësimeve, qasjes së avokatëve në gjykatë, përmirësimit të thirrjeve të palëve, pa përjashtuar thirrjet në formë elektronike, përfaqësimit të palëve me asistencë sociale dhe tarifat për ex-officio”.
“Të dyja palët zotohen për zbatimin në mirëbesim të memorandumit, ashtu që ndër të tjera, Oda e Avokatëve të Kosovës, përmes organeve të saj drejtuese, shumë shpejtë do të trajtojë çështjen e zbatimit të Memorandumit të ngritur nga KGJK. Oda e Avokatëve, zotohet se do t’iu bëjë thirrje avokatëve që të respektojnë standardet profesionale dhe të etikës, ndërsa KGJK zotohet që do t’iu bëjë thirrje gjyqtarëve që t’i trajtojnë avokatët me dinjitet”, thuhej në njoftim të OAK-së.
Rudari ka thënë se sot “vendimet e KD të OAK-së rezulton se nuk kanë më vlerë pasi që ato janë lehtë të rrëzueshme e të ndryshueshme”.
Kryetari i Degës Rajonale të OAK-së në Prishtinë, Nasuf Hasani, ka kërkuar dorëheqjen e Këshillit Drejtues, për shkak të vendimit të parë të cilin e ka cilësuar të kundërligjshëm.
“Kryetari, nënkryetari dhe të gjithë ata anëtarë të Këshillit Drejtues të Odës së Avokatëve të Kosovës, të cilët kishin marrë vendime të kundërligjshme për të mos dërguar avokatë sipas detyrës zyrtare, sot u detyruan të tërhiqen prej atyre vendimeve të cilat i mbrojtën që nga data 12 korrik 2021. Këta individë e kanë cenuar rëndë imazhin e avokatisë, prandaj për të mirën e tyre dhe të avokatisë, të japin dorëheqje!” ka shkruar ai në Facebook.
Shfuqizimin e ka vlerësuar ministrja e Drejtësisë, Albulena Haxhiu. Ajo ka thënë se ky vendim s’ka pasur bazë ligjore dhe se shfuqizimi i hap rrugë vazhdimit të bashkëpunimit institucional.
“Si përfaqësues të institucioneve duhet të jemi në shërbim të ligjit dhe interesit të përgjithshëm dhe assesi interesave individuale”, ka shkruar ajo në Facebook.
Ditë më parë, KOHA raportoi se Prokuroria Themelore në Prishtinë ka nisur hetimet ndaj OAK-së pasi për dhjet muaj refuzoi të caktonte avokat për të akuzuarin për vrasjen e Tetajt. Hetimi ishte iniciuar pasi që Ministria e Drejtësisë kërkoi nga prokuroria veprim urgjent.
Një nga avokatët e caktuar nga trupi gjykues pati njoftuar se qe kërcënuar nga Oda se do t’i hiqet licenca në rast se pranon ta përfaqësojë Gogajn.
Pavarësisht që Qeveria pati marrë vendim për të ndaluar ekzekutimin e vendimit të OAK-së, kjo odë s’ishte dorëzuar. Si pasojë e vendimit, Ministria e Drejtësisë dhe KGJK-ja patën paralajmëruar se do të ndërpresin bashkëpunimin. As kjo s’kishte kryer punë.
29-vjeçari Agonis Tetaj ishte vrarë në vendin e tij të punës në shtator të vitit 2018. Rasti ishte kthyer në pikën zero, pas reagimit të babait të viktimës, i cili alarmoi institucionet dhe ambasadat në Kosovë, për shkak se prokurori i rastit në fjalën përfundimtare kishte vendosur ta rikualifikonte veprën penale nga vrasje e rëndë në vrasje nga pakujdesia. Atëkohë qe publikuar edhe një video e momentit të vrasjes, kur shihet i dyshuari tek ia drejton armën Tetajt dhe më pas shkrep në të.