Nënshkrimi i deklaratës për personat e zhdukur nga lufta e fundit dhe drafti i Asociacionit të Komunave me Shumicë Serbe, janë çështjet për të cilat do të diskutohet në takimin e së martës pasdite në Bruksel, në takimin e parë mes kryeministrit të Kosovës, Albin Kurti, dhe presidentit të Serbisë, Aleksandër Vuçiqi, pas marrëveshjes së Ohrit.
Bashkimi Evropian ka thënë se pret që palët “të miratojnë Deklaratën për Personat e Zhdukur si pikë të parë të rendit të ditës, e cila do të pasohet nga prezantimi dhe diskutimi mbi projekt-statutin e Asociacionit të komunave me shumicë serbe”.
Lidhur me draftin, që është paralajmëruar të prezantohet të martën, kryeministri Kurti ka thënë për mediumin kroat “Hina” se nuk e ka parë atë.
Të hënën në mbrëmje, kryeministri Kurti e ka vlerësuar si kompleks dhe të thjeshtë takimin e së martës.
“Kam arritur në Bruksel dhe kam kaluar ditën duke u përgatitur për takimin e nesërm. Përgatitja për negociata është si komplekse ashtu edhe e thjeshtë: komplekse sepse ka bollëk informatash dhe detaje të përfshira, në mes tjerash, por e thjeshtë sepse dëshirat e Kosovës janë të qarta, të sinqerta dhe fisnike”, ka shkruar Kurti në Twitter.
Takimi pritet të nisë nga ora 18:00, nën ndërmjetësimin e shefit të politikës së jashtme të Bashkimit Evropian, Josep Borrell, dhe emisarit për dialogun, Miroslav Lajçak.
Edhe
Nis takimi Kurti - Vuçiq
Më 27 shkurt në Bruksel, Kosova dhe Serbia arritën pajtueshmëri për marrëveshjen për normalizim raportesh. Më 18 mars, në Ohër të Maqedonisë së Veriut, palët u pajtuan edhe për aneksin e zbatimit. Pavarësisht se për asnjërën s’është vënë nënshkrim, në BE i kanë cilësuar si obligative dakordimet.
