Kjo është Qendra Korrektuese në Smrekonicë, ku aktualisht janë 137 të burgosur.
E 10 prej tyre, për çdo ditë pune, janë jashtë këtyre hapësirave.
Ndonëse janë në vuajtje të dënimit në Burgun e hapur të Smrekonicës, ata aktualisht janë edhe duke punuar jashtë këtij institucioni, çdo ditë pune, nga ora 8:00 e mëngjesit deri në 16:00, në kompani të ndryshme private, raporton emisioni SOT në KTV.
E njëri prej tyre është G. Batalli, 63 vjeç, i cili që nga fillimi, kur Shërbimi Korrektues i Kosovës (ShKK) filloi së zbatuari Udhëzimin Administrativ në Qendrën Korrektuese të tipit të hapur të Smrekonicës, ka gjetur punë në kompaninë “Renelual Tahiri”, ku ushtron pozitën e zëvendësmenaxherit.
Batalli për KTV-në thotë se kjo i ka ndihmuar t’i kalojë më lehtë ditët e vështira si i burgosur.
Edhe
Shtatë të dënuar nisin punën jashtë institucionit korrektues
Ferid Xhoxhaj, menaxher në “Renelual Tahiri”, thotë se ndihet mirë që i ka ofruar një mundësi të tillë një personi i cili është i privuar nga liria.
Ai thotë se po të mundte, do të bënte edhe më shumë për të burgosurit.
Drejtori i Qendrës Korrektuese në Smrekonicë, Xhevdet Maçastena, thotë se për dallim nga burgjet e tjera, vetëm ata e kanë të drejtën të punësojnë të burgosur nëpër kompani të ndryshme.
Ai thotë se kjo qendër është e tipit të hapur dhe të burgosurit kanë më shumë liri sesa qendrat e tjera korrektuese të Kosovës.
Maçastena thotë se 10 të burgosurit e punësuar dalin nga burgu pa shoqëri të askujt dhe kthehen sërish për të kaluar pasditen dhe mbrëmjen në qeli.
Edhe
Dy ikje nga burgjet brenda një jave
Ai tregon se jo të gjithë të burgosurit mund të përfitojnë nga e drejta për punësim. Sipas tij, fillimisht kontrollohen historiku, sjelljet dhe detajet e tjera të të burgosurve e më pas, merret vendimi për punë.
Zyrtarët e burgjeve thonë se ky është një pilot-projekt, i cili ka synim të zgjerohet edhe nëpër qendra të tjera, sikurse Burgu i Femrave në Lipjan.
