Ish-kryenegociatorja, Edita Tahiri, e ka quajtur dështim vendimin e fundit të Qeverisë së Kosovës lidhur me afatin për konvertimin e targave ilegale serbe në RKS.
Tahiri përmes një postimi në Facebook ka thënë se Qeveria me këtë vendim as nuk e zbatoi marrëveshjen për targa dhe as nuk u koordinua me partnerët amerikanë.
“Qeveria as nuk e zbatoi marrëveshjen për targa dhe as nuk koordinoi me partneret amerikan. Dy dështime! Injorance politike!”, ka shkruar Tahiri.
Qeveria e Kosovës ka vendosur të premten të bëjë shkallëzimin e sanksioneve që i presin qytetarët që nuk i respektojnë afatet e vendosura për kthim të targave ilegale në ato RKS.
Pas kërkesave të ndërkombëtarëve që afati i kthimit të targave ilegale në ato RKS të shtyhet edhe për dhjetë muaj, kryeministri i Kosovës, Albin Kurti, ka shpalosur në mbledhjen e Qeverisë vendimin që sipas tij “është përgjigje për ndjeshmërinë e shtuar ndërkombëtare për paqen dhe sigurinë”.
“Ato janë targa ilegale. Qeveria ka obliguar qytetarët t’i kthejnë në targa RKS. Tash ne kemi zhvilluar diskutime edhe të brendshme edhe me organet e sigurisë. Kemi ardhur në përfundim të sjellim propozim një vendim që bën sekuencim dhe shkallëzim të sanksioneve me rastin e zbatimit të këtij vendimi. Për tri javë, nga 1 nëntori deri më 21 nëntor do të jetë masa e qortimit, pastaj për dy muaj deri më 21 janar do të jetë masa e gjobitjes, dhe më pastaj nga 21 janari do të kemi targa provuese për dy muaj të tjerë, pas së cilës datë më 21 prill s’mund të ketë sepse s’mund të lejohen targa të tjera në Republikën e Kosovës. Pra me këtë rast me këtë sekuencim dhe shkallëzim ne tregojmë seriozitetin tonë që padyshim ta zbatojmë vendimin që kemi marrë e t’u japim shanse të gjithë atyre që dëshirojnë të integrohen”, ka thënë Kurti duke arsyetuar propozimin.
Shtetet e Bashkuara të Amerikës janë shprehur të zhgënjyera pasi Qeveria e Kosovës vendosi të mos e shtyjë afatin për riregjistrimin e veturave që kanë targa të lëshuara nga Serbia dhe t’i konvertojnë ato në targat RKS.
Zbatimi i vendimit për targa ishte paraparë të hynte në fuqi më 1 gusht, por pas barrikadave të vëna nga serbët dhe sulmeve të armatosura, Qeveria e pati shtyrë zbatimin, me kërkesë të ndërkombëtarëve. Afati përfundon më 31 tetor. E përkundër lehtësirave që u janë krijuar serbëve për konvertimin e targave nga ilegale në legale, deri më tani në Kosovë janë regjistruar vetëm 20 automjeteve me targa RKS.
