Shefi i deputetëve të Aleancës për Ardhmërinë e Kosovës, Besnik Tahiri, e ka quajtur alarmante gjendjen e bizneseve të vogla në vend. Ai ka thënë se Qeveria Kurti ose duhet të veprojë ose të dorëhiqet.
Tahiri ka thënë se Kosova po shkon drejt rritjes së papunësisë e rritjes së varfërisë.
“Alarmante, kolapsi i ekonomisë së vogël! Kosova po përjeton një tronditje ekonomike shkak i “shembjes’ së bizneseve. Me qindra biznese të vogla gjithandej Kosovës, duke përfshirë dyqane, biznese të vogla të shitjes, kafiteri, restorante janë duke u mbyllur për shkak të mungesës së konsumit. Informatat e para të tremujorit të parë të vitit 2024 rreth qarkullimit të bizneseve që operojnë në Kosovë janë alarmante. Fuqia blerëse ka rënë nga 15% deri në 50%. Me mbylljen e bizneseve do të shkojmë drejt rritjes së papunësisë në Kosovë që ndikon në rritjen e varfërisë dhe në uljen e nivelit të jetesës për qytetarët”, ka shkruar ai në Facebook.
Sipas tij, Qeveria Kurti “me retorikën e vet të luftës, me konfliktin e hapur me bashkësinë ndërkombëtare duke e mbajtur Kosovën nën sanksione, dhe duke mos pasur asnjë investim të huaj të mirëfilltë në vend, është duke e bankrotuar Kosovën”.
“Dhe, të rinjtë po detyrohen t’ia mësyjnë migrimit. Qeveri, vepro ose shko!” ka përfunduar Tahiri reagimin e tij.