Siguria kibernetike kërkon përpjekje të shtuara institucionale

Në Ministrinë e Punëve të Brendshme u mbajt sot takimi i Këshillit Shtetëror për Siguri Kibernetike, lidhur me raportet e tremujorit të parë të këtij viti, të të gjitha institucioneve të cilat janë të përfshira në përmbushjen e objektiveve të përgjithshme të Strategjisë për Siguri Kibernetike.

Me këtë rast zëvendësministri i Punëve të Brendshme, njëherit koordinator kombëtar për Siguri Kibernetike, Selami Shkodra, vlerësoi punën e bërë deri më tani. Ai tha se gjatë periudhës janë mbajtur disa takime të rëndësishme, si jashtë dhe brenda vendit, në prezantime me qëllim të mësimit të përvojave të domosdoshme me avancimin e teknologjisë.

Ai theksoi se për kundër përpjekjeve maksimale për ngritjen e sigurisë kibernetike, me këtë hov të teknologjisë mund të konstatohet se njohuritë mbi kërcënimet e sulmeve kibernetike dhe sigurinë kibernetike në përgjithësi u mungojnë edhe një pjesë të madhe e qytetarëve, si dhe zyrtarëve të institucione publike.

Të gjithë anëtarët e Këshillit u dakorduan se është e domosdoshme për të ngritur sigurinë në gjitha institucionet publike, me qëllim të vlerësimit të rëndësisë që ka siguria kibernetike, duke hartuar plane konkrete të ngritjes së kapaciteteve profesionale dhe teknologjike.

Nga zëvendësministri Shkodra u kërkua që për çdo sfidë në implementim të aktiviteteve të planit të veprimit, të njoftohet Këshilli Shtetëror për Siguri Kibernetike, i cili si i tillë mund të mbajë edhe takime të tjera konform nevojave që kanë institucionet e Republikës së Kosovës.