Si e “zbuloi” Haradinaj MPJ-në e Kosovës dhe si e njoftoi Pacolli për aktivitetet e saj

Një takim i kryeministrit të Kosovës Ramush Haradinaj me vartësin e tij, zëvendëskryeministrin dhe ministrin e Punëve të Jashtme, Behgjet Pacolli, është prezantuar si aktivitet kryesor i sotëm i Haradinajt dhe i Pacollit, transmeton Koha.net, thuajse nuk i përkasin të njëjtës qeveri, ose sikur ata të mos kenë kontakt të përditshëm, që së paku do të duhej t’i kishin.

Takimi është mbajtur në selinë e Ministrisë së Punëve të Jashtme pak ditë pasi Haradinaj, me një pjesë të kabinetit vet, udhëtoi në Bruksel me aeroplanin privat të Pacollit. Edhe ky udhëtim qe mediatizuar për koordinatat që gjoja i ishin dhënë gabimisht avionit të tij.

Haradinaj, në zyrën e Pacolli (të cilën ai e ka rregulluar po ashtu në mënyrë private), ka qëndruar me bashkëpunëtorët.

Është jo vetëm normale por edhe domosdoshme që kryeministri të kontaktojë e të konsultohet me anëtarët e kabinetit që i ka zgjedhur vetë, por çudia shfaqet kur këto kontakte mediatizohen si ngjarje të veçanta.

Pas takimit Haradinaj dhe Pacolli kanë mbajtur një konferencë shtypi, sikur të ishin anëtarë të qeverive të ndryshme.

Edhe Arbëri 30 pri 2020 Borgesi në Tiranë

Se çfarë kanë biseduar gjatë këtij takimi, po e publikojmë të plotë kumtesën nga Kryeministria:

Kryeministri i Republikës së Kosovës, ka zhvilluar një vizite pune në Ministrinë e Punëve të Jashtme, ku është pritur nga zëvendëskryeministri/njëherësh ministër i Punëve të Jashtme, Behgjet Pacolli, me bashkëpunëtorë.

Me këtë rast, kryeministri Haradinaj ka ofruar mbështetjen e tij për projektet dhe planet konkrete të Ministrisë së Punëve të Jashtme, duke thënë se së bashku me zëvendëskryeministrin/njëherësh ministrin e Punëve të Jashtme, z.Pacolli, kanë punuar shumë rreth politikës së jashtme të Kosovës, duke e konsideruar politikën e jashtme temë mjaft të rëndësishme për Kosovën.

“Kemi filluar punën si Kosovë në planin e jashtëm të sfiduar në planin politik, të sigurisë, por edhe në atë ekonomik. Beteja diplomatike për Kosovën është bart edhe te shumë vende të largëta rreth njohjeve. Poashtu, kemi vështirësi të tjera edhe në regjion dhe në integrimet euroatlantike, pra, jemi shumë të sfiduar në planin e jashtëm”, tha kryeministri Haradinaj dhe shtoi se përkundër faktit që janë të sfiduar, Ministria e Punëve të Jashtme dhe ministri Pacolli, kanë bërë punë të mrekullueshme dhe nuk kanë lejuar prapësimin e pozicionit të Kosovës në planin diplomatik, edhe në ato vende të largëta ku ka qenë një target i oponentëve tanë.

Më tej, kryeministri Haradinaj tha se kanë plane dhe projekte konkrete dhe sa herë që ka lajme pozitive do t’i bëjnë të njohura për publikun, siç ishte lajmi për rekomandimin pozitiv për liberalizimin e vizave, duke i siguruar të gjithë qytetarët e Kosovës, se në planin e jashtëm politika e Kosovës është unike.

Nga ana e tij, zëvendëskryeministri/njëherësh ministër i Punëve të Jashtme, Behgjet Pacolli, duke e cilësuar shumë të rëndësishme vizitën e parë të kryeministrit Haradinaj, për të dhe Ministrinë të cilën ai e udhëheq, e informoi kryeministrin për të gjitha punët që janë bërë gjatë kësaj periudhe, si dhe për angazhimet e diplomacisë kosovare në çështjen e lobimit për shtimin e njohjeve të reja, rregulloren e re të MPJ-së, bashkëpunimet bilaterale, multilaterale dhe rajonale, integrimet euroatlantike, anëtarësimin e Kosovës në Këshillin e Evropës, në UNESCO, INTERPOL si dhe sfida tjera me të cilat është duke u përballur kjo ministri.

Edhe Arbëri 2 dhj 2019 Pacolli takon ambasadorët e Quintit në Kosovë

Po ashtu, zëvendëskryeministri/njëherësh ministër i Punëve të Jashtme, Behgjet Pacolli, e ka informuar kryeministrin Haradinaj, rreth procesit të bashkëpunimit të Evropës Juglindore, kryesimin e së cilës vitin tjetër do ta marrë Republika e Kosovës.

Gjatë konferencës, kryeministri Haradinaj dhe zëvendëskryeministri/ministri, Pacolli i janë përgjigjur interesimit të mediave për tema të ndryshme.