Si bëhet planifikimi familjar te ne

Planifikimi familjar u mundëson çifteve që të përcaktojnë numrin e dëshiruar të fëmijëve si dhe hapësirën kohore mes shtatzënive. Por planifikimi familjar arrihet nëpërmjet informimit, edukimit dhe përdorimit të metodave kontraceptive, raporton KTV.

Kështu thuhet në raportin e publikuar nga Fondi për Popullsi i Kombeve të Bashkuara zyra në Prishtinë. Ky raport i prezantuar nga Koalicioni K10 në shënimin e Ditës Botërore të Popullsisë, tregon se 650 të anketuar në vendin tonë kanë njohuri për mjetet kontraceptive, por që mbetet i vogël numri i përdoruesve të tyre.

Sipas Zarife Miftarit, nga zyra për planifikim familjar në Kosovë, të gjitha grupmoshat informacionet për shëndetin seksual riprodhues, i marrin nga televizioni dhe shumë pak ose fare nga institucionet shëndetësore ose në shkolla.

Miftari thotë se Ministria e Shëndetësisë duhet të sigurojë mjetet kontraceptive falas sikurse barnat esenciale, por kjo nuk është duke ndodhur.

Ndërkaq Merita Vuthaj, përfaqësuese nga Ministria e Shëndetësisë, ka thënë se ky institucion do të krijojë strategji të sigurimit falas të kontraceptivëve.

Gjatë prezantimit të raportit u tha se kujdesi për shëndetin njerëzor dhe përdorimi i mjeteve mbrojtëse nuk do të thotë se do të ulë numrin e natalitetit në vend, por të bëjë planifikimin familjar bazuar në kërkesat familjare dhe mundësitë financiare.