Shqiptarë, serbë e romë “bashkëvjedhës të rëndë” në Rahovec

Në qytetin e Rahovecit, respektivisht në lagjen veriore ku jetojnë komunitete të ndryshme, në fund të vitit 2016 dhe në tremujorin e parë të këtij viti kanë ndodhur disa raste të vjedhjeve dhe vjedhjeve të rënda, që tek qytetarët ishte krijuar një ndjenjë pasigurie, njofton kumtesa policore, transmeton Koha.net.

Sektori i hetimeve të stacionit policor në Rahovec pas një pune intensive operativo-hetimore ka arritur të identifikojë dhe të arrestojë tetë persona të dyshuar si kryes të mundshëm të këtyre veprave, e po ashtu janë shoqëruar në Polici edhe pesë persona të tjerë të dyshuar për pranimin e mallrave të vjedhura.

Me këtë rast janë zbuluar gjashtëmbëdhjetë raste penale vjedhje dhe vjedhje të rënda si dhe janë konfiskuar shumë gjësende të vjedhura: (frigoriferë, moto kultivatorë, televizorë, aparate salduese, sharra motorike, gjeneratorë), si dhe shumë pajisje të tjera elektronike.

Personat e arrestuar janë të etniteteve të ndryshme, si: shqiptarë, serbë dhe romë dhe ndaj tyre Policia ka filluar hetimet dhe do të ushtrojë kallëzim penal ndaj tyre në koordinim me Prokurorinë Themelore në Gjakovë.

{gallery}