Shqipëria i kërkon Sllovakisë të hapë zyre ndërlidhëse për Kosovën, ndonëse ajo ka vite që ekziston

Ministrja e Punëve të Jashtme e Shqipërisë, Olta Xhaçka, ka kërkuar nga Sllovakia të hapë një zyrë ndërlidhëse për Kosovën në Bratislavë, ndonëse ajo ka vite që ekziston.

Në një vizitë që Ivan Korcok, ministër i Jashtëm i Sllovakisë ka bërë në Tiranë të mërkurën, ku si temë diskutimi ishte procesi i integrimit të Shqipërisë dhe rajonit në Bashkimin Evropian, Xhaçka ka thënë se i ka kërkuar Sllovakisë që të hapë këtë zyrë si shenjë përkrahjeje për dialogun mes Kosovës dhe Serbisë.

Sllovakia është një nga pesë shtetet e Bashkimit Evropian që ka refuzuar ta njohë Kosovën.

Miroslav Lajçak, që dikur ishte ministër i Punëve të Jashtme të Sllovakisë, tani është përfaqësues special i Bashkimit Evropian për dialogun Kosovë-Serbi.