Sheshi i Pejës dekorohet nga një biznes privat, opozita ngre dyshime

Tenderi i shpallur para dy jave për dekorimin e qytetit për festat e fundvitit është anuluar nga Komuna e Pejës.

Anulimin e këtij tenderi, komuna e ka publikuar në faqen e saj zyrtare më 5 dhjetor, kurse një ditë më vonë sheshi është stolisur falas nga kompania Devolli.

Menaxheri i Zyrës së Prokurimit, Xhemë Berisha, ka treguar se arsyeja e anulimit të tenderit ka qenë pikërisht interesimi i shprehur i komunitetit të biznesit në Pejë që falas ta stolisë sheshin e qytetit.

“Komuniteti i biznesit në komunën e Pejës ka shpreh gatishmëri që ta ndihmojë e ta përkrahë komunën e Pejës sivjet për dekorimin e qytetit. Pastaj nuk kemi pas nevojë të krijojmë shpenzime të dyfishta dhe kemi marr vendim që të anulohet ky aktivitet i prokurimit”, tregon Berisha arsyen pse është anuluar ky tender, për të cilin sipas tij ende nuk kishte aplikuar asnjë operator.

Mirëpo, nga subjekti opozitar, Lëvizja Vetëvendosje, janë ngritur dyshimet se komuna i ka krijuar favore kompanisë që stolisi sheshin.

Edhe Arbëri 26 nën 2020 Pas shtatë vjetëve komuna vendos ta stolisë qytetin për festat e fundvitit

“Kemi informacione që si kundërvlerë për dekorimin e sheshit, komuna ia ka lejuar kësaj kompanie që të vendosë aparatet e kafeve në hapësirat e brendshme të objekteve të komunës”, pohoi Besnik Zeqiraj, sekretar i degës së LVV-së në Pejë.

Lidhur me këtë dyshim, drejtori i Administratës Komunale, Rexhep Kurtbogaj, ka pohuar se kompania ka leje, por që atë leje ai nuk e ka treguar.

“Më duhet ta gjejë lejen, sepse automatet e kafes janë vendosur në objektin e komunës para se jam bërë unë drejtor”, ka pohuar Rexhbogaj, që udhëheq këtë drejtori nga qershori i këtij viti.

Sipas tij, procedurat e konkurrimit për lejimin e shfrytëzimit të hapësirave komunale, janë kompetencë e Drejtorisë për Çështje Pronësore-Juridike.

KOHA ka kontaktuar drejtorin e kësaj drejtorie, Arianit Krasniqi, por ai ka refuzuar të flasë me arsyetimin se është i zënë. KOHA ka kërkuar përgjigje edhe nga kompania Devolli lidhur me këtë temë, por deri në momentin e raportimit, nuk ka marrë përgjigje.

Që nga viti 2013, kur e ka marr udhëheqjen e kësaj komune koalicioni LDK-PDK, vetëm në vitin 2015 ishin shpenzuar 10 mijë euro nga arka e komunës për stolisje të sheshit për festat e fundvitit.

Për vitet tjera, 2016, 2017, 2018 dhe 2019 nuk është ndarë fare buxhet, derisa sheshi ishte stolisur nga disa biznese të Pejës.

Edhe Arbëri 16 dhj 2020 Ankesat e operatorëve shtyjnë fillimin e ndërtimit të objektit të gjimnazit të Pejës

Shuma prej 30 mijë euro që ishte planifikuar për dekorimin e qytetit, sipas drejtorit të Financave, Jeton Abazaj, ka qenë e ndarë nga buxheti i të hyrave vetanake të komunës.

“Tash këto mjete mund të barten në vitin e ardhshëm ose mund të shpenzohen në kategorinë për mallra e shërbime, aty ku ka nevojë komuna. Nëse nuk shpenzohen diku tjetër, mund t’i shfrytëzojmë edhe për t’i paguar shujtat e mësimdhënësve”, tregoi Abazaj.