Shasha: Është me rëndësi që Franca të ndryshojë mendimin për liberalizimin e vizave

Demush Shasha nga Instituti Epik ka thënë se janë së paku dy shtete që kanë shfaqur hezitimin për liberalizimin e vizave, pra Franca dhe Holanda.

Ai në emisionin “60 minuta” në KTV ka thënë se Franca është pengesa kryesore, dhe nëse ajo e ndryshon qëndrimin, vendet tjera skeptike do ta përcjellin veprimin e saj.

Sipas tij, secili vend e ka të drejtën e vet për të pasur vendimin e vet.

“Nuk është që presim ndonjë efekt konkret nga letra e dërguar Emmanuel Macron, por kemi provuar dhe nuk kemi mundur të qëndrojmë të heshtur. Ne shpresojmë që sado pak kjo letër të ndihmojë. Unë jam i bindur që të gjitha qeveritë në vazhdimësi kanë bërë të qartë vendimin e tyre për vizat. Ne jemi viktima të zgjedhje pas zgjedhjeve. Do të shohim nëse Macron do të kuptojë rëndësinë e liberalizimit të vizave për Kosovën”, ka thënë ai.

Shasha ka thënë se prezenca e Bashkimit Evropian do të zmadhohet nëse ai përfshinë edhe vendet e Ballkanit Perëndimor.

Ai tutje ka thënë se çdo organizim social është e shëndetshme për Kosovën si demokraci, por në këtë rast edhe për liberalizimin e vizave.

Sipas tij, këto çështje janë më shumë pjesë e kalkulimeve gjeopolitike. Ai ka thënë se fati i liberalizimit të vizave është i lidhur me fatin e dialogut Kosovë-Serbi.