Serbët në veri të pa interesuar të blejnë produktet nga “dyqanet” e hapura nga Qeveria e Kosovës

Edhe të martën të gjitha dyqanet kanë qenë të mbyllura në katër komunat veriore të Kosovës, në shenjë proteste ndaj taksës për mallrat serbe. Por, Qeveria e Kosovës ka ndërmarrë një aksion për të furnizuar këtë pjesë me produkte ushqimore.

Dy kamionë me ushqime qëndruan për disa orë rresht në Lagjen e Boshnjakëve në Mitrovicën e Veriut, raporton KTV.

Ata i dërgoi atje Qeveria e Kosovës, në kuadër të përpjekjes për furnizim të pjesës veriore të vendit, pas mbylljes së të gjitha dyqaneve atje.

Gjatë qëndrimit të ekipit të KTV-së aty, nuk u pa interesim i madh i qytetarëve për të blerë produkte.

Koordinatori nga Ministria e Tregtisë dhe Industrisë, Gazmend Hoti, tha se Qeveria do të vazhdojë edhe në ditët në vazhdim me këtë plan. Hoti tha se u vendosën në pikat ku Policia e Kosovës u rekomandoi se ka siguri.

Në Zveçan shumica e banorëve të veriut refuzojnë të flasin para kamerës, por situatën e vlerësojnë si katastrofale dhe thonë se nuk do të blejnë produkte shqiptare.