Rritet numri i nxënësve në shkollat private, fajësohen institucionet qeverisëse

Afro 22 mijë nxënës janë të regjistruar në shkolla private të arsimit parauniversitar, që është 7 mijë më shumë se që ishte para 5 vjetëve. Prindërit thonë se arsyet pse zgjedhin shkollat private janë klasat me pak nxënës dhe planprogrami. E njohësit e arsimit kritikojnë shtetin për sabotim të sektorit publik

Në pesë vjetët e fundit është shtuar dukshëm interesimi i prindërve për t’i regjistruar fëmijët në institucione arsimore private.

Afro 22 mijë nxënës janë të regjistruar në shkolla private të arsimit parauniversitar, që është 7 mijë më shumë se që ishte para 5 vjetëve.

Dritan Axhami thotë se ka vendosur që vajzën e tij ta dërgojë në një nga shkollat private për shkak të numrit të madh të nxënësve dhe pakënaqësitë në planprogramin që ofrojnë institucionet publike.

“Pra arsyeja kryesore ishte numri i madh i nxënësve dhe mosangazhimi i mësueses apo mësuesit në këtë rast me nxënësit dhe tjetra është planprogrami, që për mendimin tim ishte shumë tradicional dhe fëmijët tani janë më të prirë në aspektin e teknologjisë dhe e kanë të pamundur ta kenë atë qasje”, ka deklaruar Axhami.

Pagesa për një vit shkollor në institucionet arsimore private lëviz nga 1.200 deri në 5 mijë euro.

Sipas njohëses të çështjeve të arsimit, Valmira Morina, rritja e interesimit për t’i regjistruar fëmijët në shkolla private duhet të jetë kambanë për shtetin.

“Duke pasur parasysh që shumica e politikanëve tanë, deputetëve tanë e drejtorë të DKA-së, të cilët zgjedhin vetvetiu t’i dërgojnë fëmijët e tyre në shkolla private, atëherë është në pikëpyetje sa mund të presim prej tyre që të marrin iniciativa që të përmirësohet sistemi arsimor”, ka theksuar Morina.

Edhe Arbëri 24 shk 2026 Mbi 6 mijë nxënës më shumë të regjistruar në shkolla private brenda një dekade

Në Ministri të Arsimit thanë se janë duke punuar në përmirësimin e cilësisë në sektorin publik.

“Ministria e Arsimit tash e tre vjet në vazhdimësi është duke u angazhuar për të përmirësuar cilësinë në sektorin publik e duke intervenuar në infrastrukturë, në trajnimin e mësimdhënësve, zhvillimin e programeve arsimore të avancuara, përmirësimin e infrastrukturës ligjore, rishikimin e teksteve shkollore etj.”, thuhet në përgjigjen e MASHTI-t.

Dobësitë e sistemit arsimor publik dhe privat janë paraqitur në testimet ndërkombëtare. Rezultatet e këtyre testimeve kanë theksuar se nxënësit nuk arrijnë të kuptojnë atë që e lexojnë.