Gegë Zefi, në fshatin Bibaj të komunës së Ferizajt, kishte mbjellë 1 hektarë me dredhëza dhe 4 të tjera me mjedra.
Por nga breshëri i shpeshtë kohëve të fundit, Gegë Zefit i janë shkatërruar 90 përqind e dredhëzave dhe 30 përqind e mjedrave, raporton KTV.
Ai thotë se të mbjellat më nuk mund të rikuperohen por pret që komuna ose qeveria t'ia kompensojë dëmin.
Rreth 700 mijë euro është shuma e dëmeve të shkaktuara nga reshjet e shiut dhe breshrit në komunën e Ferizajt.
Por asnjë prej të dëmtuarve nuk është kompensuar nga komuna, pasi sipas drejtorit të Bujqësisë, nuk ka buxhet për kompensim.
Mirëpo, qeveria dhe Ministria e Bujqësisë kanë dhënë deklarata kontradiktore në pyetjen e KTV-së lidhur me fondin e veçantë për kompensimin e dëmeve.
Edhe
Fermerët e Ferizajt protestojnë para komunës, duan kompensim të dëmeve nga breshëri
Në përgjigjen e Ministrisë së Bujqësisë është thënë se nuk ekziston një fond i veçantë për kompensimin e mjeteve dhe se janë duke përgatitur një raport për mundësitë e kompensimit përmes një buxheti shtesë ose të ndarjes së buxhetit nga ana e qeverisë.
Ndërsa në përgjigjen e Zyrës së Kryeministrit thuhet se do të shikohet këto ditë mundësia për kompensim pasi ekziston një fond i veçantë në kuadër të Ministrisë së Bujqësisë për kompensim të dëmeve nga të reshurat.
