Liderë dhe përfaqëues partish në vend kanë reaguar pasi Zoran Vukotiqit iu shqiptuan 10 vjet burg, nën akuzat për dhunim gjatë luftës.
Kryeministri Albin Kurti ka deklaruar se drejtësia është e domosdoshme, “edhe në momente si ky kur vjen shumë vonë”. Ai ka thënë se viktimat e dhunës seksuale kanë nevojë për drejtësi dhe përkrahjen shoqërore, për të luftuar stigmën që i përcjellë.
“Krimet e luftës nuk parashkruhen, dhe nuk mund të kenë amnisti për këtë krim të kryer gjatë luftës në Kosovë, këtë armë lufte të përdorur nga okupatori”, ka shkruar në Facebook.
Dënimin e Vukotiqit, presidentja Osmani e ka cilësuar si përparim të rëndësishëm, derisa ka thënë se drejtësia e vonuar është drejtësi e mohuar.
“Por mos të harrojmë se drejtësia e vonuar është e drejtësisë e mohuar. Ne kemi nevojë për përgjegjësi dhe drejtësi për mijëra gra të tjera kosovare që nuk e kanë marrë atë”, ka shkruar në Tëitter.
Kreu i Lidhjes Demokratike të Kosovës, Lumir Abdixhiku, ka thënë se krimet e luftës as nuk vjetërsohen dhe as nuk harrohen, duke potencuar se dënimi i Vukoviqit për dhunim gjatë luftës, duhet t’i shërbejë prokurorisë si motiv për t’i sjellë drejtësi secilit kriminel që sot është i lirë.
Kreu i partisë opozitare, Partisë Demokratike të Kosovës, Memli Krasniqi, ka deklaruar se s’mund të ketë drejtësi të plotë për viktimat e dhunës seksuale gjatë luftës në Kosovë, “pa u vënë para drejtësisë secili person përgjegjës për këto dhunime”.
Krasniqi ka thënë se që nga paslufta, kriminelët serbë janë mbajtur të fshehur, duke thënë se rasti i dënimit të Zoran Vukotiqit, është i pari.
“Përderisa duhet të angazhohemi që viktimat e dhunës seksuale gjatë luftës të gjejnë integrimin e plotë në mesin tonë, duhet po ashtu të inkurajojmë organet tona të drejtësisë që të mos ndalen, deri sa të japë përgjegjësi edhe krimineli i fundit”, ka shkruar ai në Facebook.