Anëtarja e klubit parlamentar “Lëvizja Serbia e Re për shpëtimin e Serbisë”, Sanda Rashkoviq-Iviq ka pyetur sot kryeministrin dhe kandidatin për president të Serbisë, Aleksandër Vuçiq, se “duke pranuar kushtet e presidentit të Kosovës Hashim Thaçi për vizitë në Kosovë, po përul veten, serbët dhe Serbinë”.
“Kryeministri ynë dhe kandidati për president, Vuçiqi i madh, merr leje nga Hashim Thaçi me kushtin se në Kosovë nuk mund të vijë me dy ministrat, të policisë dhe të mbrojtjes. Kryeministri ynë shkon në Kosovë nën kushte përulëse”, ka thënë ndër tjerash Rashkoviq-Iviq, transmeton KP.
Sipas saj, Vuçiq po jep mbështetje dhe instruksione për mbajtjen e zgjedhjeve në Kosovë, të cilat dallojnë dukshëm nga rregulloret për mbajtjen e zgjedhjeve “në pjesët tjera të Serbisë”.
“E gjithë kjo nuk është vetëm shenjë se po përgatitet vjedhje e madhe e zgjedhjeve në Kosovë, por në mënyrë implicite njihet pavarësia e Kosovës”, ka thënë ajo.
