Qeveria do të prishë marrëveshjen Telekom - Z-Mobile para privatizimit

Qeveria e Kosovës ka në plan të prishë marrëveshjen e arritur mes Telekomit të Kosovës dhe kompanisë ZMobile.

Ekzekutivi është duke pritur një raport zyrtar nga bordi i kësaj ndërmarrjeje për veprime të mëtutjeshme, raporton KTV.

Ministri i Zhvillimit Ekonomik, Valdrin Lluka, i ka thënë KTV-së se përpos këtij hapi, po pret edhe planin ristrukturues të ndërmarrjes, pa përjashtuar edhe uljen e pagave.

Sipas tij, për vetëm 3 muaj, humbjet në Telekom janë 4 milionë euro.

Gjitha këto veprime, sipas Llukës, lidhen me planin për privatizimin e Telekomit të Kosovës përmes Ligjit për Investimet Strategjike, por pa pjesëmarrje në vendimmarrje të qeverisë në politikat udhëheqëse të ndërmarrjes.

Dhe kjo sipas tij, ka qenë një nga arsyet e takimit të një dite më parë me drejtuesit e kompanisë së njohur franceze të telefonisë mobile, Orange.

Ekspertë të ekonomisë thonë se privatizimi i Telekomit nuk duhet të ndodhë pa dhënë përgjegjësi ata që e sollën në këtë gjendje ndërmarrjen.

Edhe Video 5 maj 2018 Qeveria do të prishë marrëveshjen Telekom - Z-Mobile para privatizimit

Veprimet e ndërmarra vijnë menjëherë pas vendimit të arbitrazhit, ku Kosova doli fituese në përballjen me kompanisë Axos.

Por bordi i drejtorëve të Telekomit të Kosovës, u ka dërguar një letër të gjithë punëtoreve, ku thotë se është dezinformatë lajmi se qeveria u ka kërkuar uljen e pagave.

Bordi thotë se nuk e ka shqyrtuar mundësinë e uljes së pagave në asnjë nga mbledhjet.