Qendra e Vaksinimit në Gjakovë deri sot ka administruar 71 mijë e 718 doza të vaksinave, 43 mijë e 562 doza të para, dhe 28 mijë e 156 me dy doza. Kështu ka bërë me dije të mërkurën për KOHËN, drejtoresha për Shëndetësi në Komunën e Gjakovës, Afërdita Spahiu-Shllaku.
Ajo ka njoftuar se aktualisht Qendra e Vaksinimit ka vaksina të mjaftueshme dhe se ka një interesim të madh të qytetarëve për t'u vaksinuar.
Spahiu-Shllaku ka folur për një interesim më të vogël për vaksinim tek grupmoshat e reja, në veçanti tek të miturit.
"Nuk kam informata se sa të mitur janë vaksinuar, por e di që më herët ka pas një interesim më të madh për vaksinimin e një kategorie të të miturve ndërsa kohëve të fundit ka rënë ky interesim", ka thënë ajo.
Zonja Spahiu-Shllaku ka bërë me dije se mesatarja ditore e vaksinimit në Gjakovë është 1300 persona. Vetëm dje ka thënë ajo janë vaksinuar 1550 veta.
Sipas drejtoreshës Spahiu-Shllaku 90 për qind e stafit të Komunës së Gjakovës janë të vaksinuar, ndërsa pjesa tjetër janë që sapo e kanë kaluar infeksionin dhe përkohësisht llogaritet se posedojnë anti-trupa të mjaftueshme.
Edhe kryeinfermierja në Qendrën e Vaksinimit në Gjakovë, Makfirete Berisha ka folur për një mbarëvajtje të punës në këtë qendër.
"Ka një interesim të madh, puna po ecë mbarë, terminet obligative i kanë evituar tollovitë", ka thënë ajo për KOHËN.
E pyetur për numrin e të miturve të vaksinuar në këtë qendër, zonja Berisha nuk ka mundur të flasë me saktësi por ka thënë se as 100 të mitur nuk janë vaksinuar aty.
"Fëmijët nga 12-15 vjeç me sëmundje kronike i vaksinojmë që të ua rrisim imunitetin, por për t'u vaksinuar ata duhet ta posedojnë raportin e mjekut paraprakisht", ka sqaruar ajo.
Komuna e Gjakovës sipas të dhënave të Institutit Kombëtar të Shëndetësisë Publike (IKSHP) nga fillimi i pandemisë ka pasur gjithsejtë 7 mijë e 937 persona të konfirmuar pozitiv me COVID-19, 18 vetëm në 24 orët e fundit. Nga shifra e përgjithshme, janë shëruar gjithsej 7 mijë e 228 persona, ndërsa raste aktive mbesin edhe 709. Nga fillimi i pandemisë në këtë komunë nga COVID-19 kanë vdekur 222 persona.
