Partia Social Demokrate ka ftuar partitë opozitare, përfaqësuesit e shoqërive civile dhe përfaqësues të sindikatave të ndryshme për t’u takuar të premten më 11 shkurt si kundërpërgjigje ndaj tarifave të reja të rrymës të vendosura nga ZRRE-ja.
Kreu i PSD-së, Dardan Molliqaj ka konfirmuar në faqen e tij në Facebook këtë ftesë.
“Nga nesër do t’i ftojmë në një takim për të premten të gjitha partitë parlamentare e joparlametare opozitare, përfaqësues të shoqërisë civile, përfaqësues të sindikatave të ndryshme dhe të gjithë ata persona publik e jopublik që janë të interesuar që bashkërisht ta kundërshtojnë vendimin e rritjes së çmimit të rrymës. Bashkërisht, do të vendosim për hapat dhe mënyrën e kundërshtimit. Rendi i ditës: Diskutimi i formave të kundërshtimit të vendimit të ZRrE për rritjen e çmimit. Të shqetësuar me vendimin e ZRrE-së ku çmimi i energjisë elektrike rritet për 100%. Pas disa javësh kundërshtimesh të propozimit të parë, aksione simbolike, konferenca e protestë të fuqishme, qeveria nuk reflektoi . Vendimi i ri është pothuajse i njëjtë me të vjetrin. Përsëri nuk preken bizneset, dhe përsëri buxheti i republikës dëmtohet me 100 milion euro dhe po ashtu për një pjesë të madhe të qytetarëve rritet fatura në fund të muajit. Në këtë krizë energjetike, të gjithë po humbim, vetëm KEDS dhe KESCO po vazhdon fitimin”, ka shkruar Molliqaj.