Prokurorja Hajdari mirëpret vendimin për gjykim të rastit “Pronto”

Adem Grabovci, Zenun Pajaziti, Besim Beqaj dhe 8 persona të tjerë që janë zyrtarë të ndryshëm publikë, do të dalin në gjykatë për rastin “Pronto”.

Kjo pasi që Gjykata e Apelit ka refuzuar ankesën e tyre për hedhje të aktakuzës dhe kundërshtim të provave, raporton KTV.

Apeli konstaton se gjykata e shkallës së parë ka dhënë në mënyrë të mjaftueshme arsye lidhur me dyshimin e bazuar mirë rreth provave të kundërshtuara dhe se drejt ka vërtetuar se ekzistojnë prova të mjaftueshme të pranueshme në aspektin ligjor-procedural, për të vazhduar më tutje.

Apeli thotë se a do të vërtetohet fajësia e tyre apo jo nuk mund të supozohet as nga gjykata e as nga palët.

Drita Hajdari, prokurore e rastit “Pronto”, thotë se nuk e ka pranuar ende këtë vendim, por ka thënë se ky është një lajm i mirë se drejtësia në vend është funksionale.

Vendimin e Gjykatës së Apelit nuk e ka pranuar ende as avokati Florent Latifaj, i cili mbron të akuzuarin Adem Grabovci.

Edhe Video 31 maj 2019 Prokurorja Hajdari mirëpret vendimin për gjykim të rastit “Pronto”

Latifaj i ka thënë KTV-së se nuk do ta kundërshtojnë vendimin, çfarëdo qoftë ai.

Vitin e kaluar, Prokuroria Speciale e Kosovës ngriti aktakuzë ndaj 11 personave, përfshirë ministrin Besim Beqaj, deputetin Zenun Pajaziti dhe ish-shefin e grupit parlamentar të PDK-së, Adem Grabovci.

Ata akuzohen për shkeljen e statusit të barabartë të shtetasve dhe banorëve të Kosovës.