Prokuroria prezanton prova që tregojnë se Jelena Gjukanoviqi spiunoi për BIA-n serbe

Prokuroria ka prezantuar provat që tregojnë se Jelena Gjukanoviq ka spiunuar për BIA-n serbe. Sipas prokurorit special, Bekim Kodraliu, Gjukanoviqi me vetëdije ka kryer veprime të përsëritura duke përcjellë informacione të dokumentuara për agjentin rezident të BIA-së, Aleksandër Vllajiq, por ka marrë edhe detyra

Fotografi e komunikime janë prezantuar të premten si dëshmi në gjykimin ndaj Jelena Gjukanoviqit, e cila akuzohet për veprën penale “Spiunazh”.

Prokuroria Speciale e akuzon Gjukanoviqin se si zyrtare e misionit të OSBE-së në Kosovë ka kryer veprime të përsëritura duke përcjellë informacione të dokumentuara për agjentin rezident të agjencisë serbe të inteligjencës, Aleksandër Vllajiq, të cilat pastaj janë transmetuar te zyrtarët e lartë të BIA-s.

“Në një moment ka aplikuar metodën e fotografimit të raporteve që ka pas para zyrës së saj dhe agjentit të BIA-së. Vllajiq i ka dërguar fotografinë se si duket në këtë pjesë. Teksti tregon në pjesën e mesazhit. Në fund e rëndësishme përmbajtja e këtyre dokumenteve ka të bëjë me sulmet terroriste në zyrat e KKZ-së në Mitrovicën e Veriut”, ka thënë Bekim Kodraliu, prokuror special.

Prokurori Kodraliu tha se dokumentet e siguruara përfshijnë analiza të brendshme të sigurisë, si dhe raporte mbi aktivitetet e Policisë. Ai tha se Gjukanoviq ka marrë edhe detyra nga BIA.

“Komunikimet e siguruara tregojnë qartë se e pandehura jo vetëm që ka dërguar këto dokumente dhe informacione por ka marrë udhëzime dhe detyra direkte nga agjenti i BIA-së, Vllajiq lidhur me mbledhjen e informacioneve, targetimin e individëve të caktuar e në veçanti është udhëzuar se si të shkruajë edhe raportet e OSBE-së në lidhje me situatën në Kosovë”, ka theksuar Kodraliu.

Pranimin e raporteve dhe informacioneve të marra nga e pandehura Gjukanoviq, e ka pranuar edhe Aleksandër Vllajiq, i cili e ka pranuar fajësinë për këtë vepër penale.

Prokurori Kodraliu tha se e akuzuara Gjukanoviq me dashje i ka shërbyer dhe ka ndihmuar BIA-në serbe për krijimin e një narrative armiqësore ndaj shtetit të Kosovës.

“Me dashje direkte iu ka shërbyer dhe ka ndihmuar një shërbim të huaj informativ në këtë rast shërbimin informativ serbe i njohur si BIA duke kontribuuar po ashtu edhe në krijimin e një narrative armiqësore ndaj shtetit të Kosovës duke rrezikuar rendin kushtetues, sigurinë kombëtare, rrezikimin serioz për jetën dhe personale të zyrtarëve shtetërorë të vendit, qytetarëve të vendit e po ashtu edhe personelin e OSBE-së misionit në Kosovë”.

Në fillim të seancës, e pandehura Gjukanoviq përsëri është deklaruar e pafajshme për veprën për të cilën akuzohet.

Ajo është arrestuar më 28 shkurt të vitit të kaluar, nën akuzën se ka shpërndarë dokumente dhe informacione të ndjeshme tek Agjencia e Inteligjencës dhe Sigurisë e Serbisë.