Prokuroria e Krimeve të Rënda bën me dije se s’ka urdhër ndalimi ndaj Albert Veliut, i njohur ndryshe si “Dëshmitari X” në audio-përgjimin e publikuar nga PD-ja.
Albert Veliu u arrestua sot bashkë me të birin në Kosovë.
“Prokuroria për Krime të Rënda po kryen hetime në procedimin penal Nr. 95/2018 regjistruar për veprën penale të “Trafikimit të narkotikeve” parashikuar nga neni 283/a i Kodit Penal. Por, sipas “Shekullit, ndaj shtetasit Albert Veliu nuk ka urdhër ndalimi apo urdhër për ekzekutimin e ndonjë vendimi të Gjykatës për Krime të Rënda”, deklaron organi i akuzës.
Nuk dihet ende se kush ka dhënë urdhrin për arrestimin e tij, pasi Policia e Kosovës është shprehur se menjëherë sapo është arrestuar kanë njoftuar autoritetet shqiptare.
Në një njoftim të shkurtër Policia e Kosovës konfirmon ndalimin por nuk jep arsyen. “Mund të ju konfirmojmë se Policia e Kosovës bazuar në autorizime ligjore më dt. 27.05.2018 ka ndaluar dy shtetas të Republikës së Shqipërisë”, thuhet në njoftim.
“Babalja” pritet t’u dorëzohet autoriteteve shqiptare për veprime të mëtejshme.