Në Qeverinë e Kosovës nuk kanë treguar nëse do të pësojë ndonjë ndryshim projektligji për ratifikimin e Marrëveshjes së demarkacionit nga versioni fillestar, i cili ishte tërhequr nga kryeministri Mustafa, shtatorin e vitit të kaluar.
Projektligji përmban vetëm katër nene përfshirë edhe klauzolën për rishikim të marrëveshjes nëse gjenden fakte të reja, shkruan sot Koha Ditore.
Sipas nenit 2, dispozitat e Marrëveshjes për Kufirin Shtetëror në mes të Republikës së Kosovës dhe Malit të Zi, e nënshkruar në Vjenë me datë 26 gusht 2015, nëse ka fakte të reja ligjore, mund të ndryshohen dhe plotësohen me pëlqimin e palëve.
“Dispozitat e kësaj marrëveshje mund të ndryshohen sipas procedurës së njëjtë të paraparë për miratim. Me pajtimin e palëve, për ndryshimin e dispozitave të marrëveshjes mund të kërkohet edhe arbitrazh ndërkombëtar”.
Pjesë përbërëse të këtij ligji janë Marrëveshja për kufirin shtetëror në mes të Republikës së Kosovës dhe Malit të Zi, e nënshkruar në Vjenë me datë 26 gusht 2015 si dhe dokumentacioni zyrtar i Komisionit shtetëror për shënimin e Kufirit mes Kosovës e Malit të Zi. Në anën tjetër, Parlamenti malazez e ka ratifikuar këtë marrëveshje. (Më shumë detaje rreth demarkacionit mund të lexoni në numrin e sotëm të Kohës Ditore)
Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.
