Prizreni për 6 muaj ka shpenzuar 20% të buxhetit të planifikuar për investime kapitale

Komuna e Prizrenit në gjashtë muajt e parë të këtij viti në kategorinë e investimeve kapitale ka shpenzuar mbi 4 milionë euro apo afër 20 për qind të planifikimit vjetor në vlerë prej 20 milionë eurosh. Ndërsa shpenzimi i përgjithshëm i buxhetit komunal për periudhën janar-qershor 2021 ka qenë 22 milionë euro apo 42 për qind të planifikimit vjetor.

“Për investime kapitale për vitin 2021 janë planifikuar 20,440,163 euro. Në periudhën janar-qershor nga kjo kategori janë shpenzuar 4,056,043 euro ose 19.84 % e shumës së planifikuar”, thuhet në raportin financiar gjashtëmujor të Komunës së Prizrenit.

Në raportin e Zyrës Kombëtare të Auditimit për pasqyrat financiare të Komunës së Prizrenit për vitin 2020 të publikuar muaj më parë thuhej se dinamika e realizimit te investimet kapitale nuk ishte në harmoni me planifikimet.

“Buxheti final në kategorinë e investimeve kapitale në krahasim me buxhetin fillestar ishte rritur për 2,645,423 euro, përkundër kësaj rritje vetëm 67% e buxhetit ishte shpenzuar. Po ashtu, edhe dinamika e realizimit nuk është në harmoni me planifikimet sepse 51% e shpenzimeve nga kjo kategori janë realizuar në tremujorin e fund vitit. Gjithashtu, vlen të theksohet se nga 88 kontratat e nënshkruara gjatë vitit 2020 në vlerë prej 15,094,586 euro, vetëm në periudhën e fund vitit janë lidhur 51% kontratave apo 45 kontrata në vlerë 4,303,016 euro. Kjo një arsye shtesë/tjetër për mos realizim të buxhetit dhe sfidë që duhet të adresohet nga menaxhmenti. Shkaku i një dukurie të tillë sipas menaxherit të prokurimit ishte vonesa në hartimin e projekteve ekzekutive të përcaktuar paraprakisht si kriter ligjor para inicimit të procedurave të prokurimit”, thuhet në raportin e auditimit.

Pavarësisht kësaj, në raportin për realizimin gjashtëmujor të buxhetit të Komunës së Prizrenit bëhet e ditur se shpenzimet e përgjithshme të buxhetit gjatë periudhës janar-qershor 2021 kanë arritur në 22,07 milionë euro ose 42 % nga 52,61 milionë euro të parashikuara për vitin 2021.

“Në kategorinë e pagave për vitin 2021 janë planifikuar 21,499,407 euro. Në periudhën janar-qershor nga kjo kategori janë shpenzuar 13,919,027 euro ose 64.74% e shumës së planifikuar. Shpenzimet në kategorinë e mallrave dhe shërbimeve deri në fund të muajit qershor kanë arritur në 3,225,154 euro ose 41% e shumës së planifikuar prej 7,846,066 euro. Në kategorinë e shpenzimeve komunale nga shuma e planifikuar prej 1,031,199 euro për vitin 2021 deri në periudhën e raportimit janë shpenzuar 336,940 euro. Planifikimi për subvencione për vitin 2021 është 1,800,171 euro, prej nga janë shpenzuar 532,250 euro”, shkruan në këtë raport.

Në dokumentin e përgatitur nga Drejtoria e Financave, figuron se shuma e tërësishme e arkëtuar e të hyrave vetjake komunale për këtë periudhë ka qenë 4,35 milionë euro ose 61% e shumës së planifikuar prej 7,17 milionë euro. Sipas raportit, realizimi i të hyrave ka qenë i kënaqshëm sa i përket pagesave tek shfrytëzimi i tokës dhe lejet e ndërtimit (65.41%), inspektimi i tokës dhe aktivitetet gjeodezike (89.17%), tatimi në pronë (82%), të ardhurat tjera (73.30 %) dhe të ardhurat nga arsimi (68.33 %).

“Realizimi i të hyrave është jo aq i kënaqshëm në arkëtimin e të të hyrave nga: licensat komerciale dhe të biznesit / Lejet (33.23%), licencat për lojëra zbavitëse, pije alkoolike, reklama, shpallje etj. (-%), shfrytëzimi i pronës komunale (26.26%), pagesat në lidhje me automjetet (32.86%), të hyrat nga biblioteka (7.38%)”, thuhet në raportin financiar gjashtëmujor.

Në të njëjtën kohë është bërë e ditur se të ardhurat totale të alokuara të buxhetit komunal për periudhën janar-qershor të vitit 2021 janë 35,30 milionë euro, nga 52,61 milionë euro të parashikuara, dhe se nga ky buxhet janë shpenzuar 22,07 milionë euro ose 42 % e shumës së planifikuar.

“Në gjashtëmujorin e parë të vitit 2021, granti qeveritar është alokuar në shumën prej 30,779,775 euro, pra 74,68% e shumës së planifikuar për tërë vitin (41,215,339 €). Shuma e shpenzuar nga ky burim i buxhetit komunal është 20,306,426 euro ose 49.27% e shumës së paraparë për sivjet. Gjatë periudhës janar- qershor 2021 të hyrat vetjake janë alokuar në shumë prej 3,613,633 euro ose 50,37% nga planifikimi prej 7,174,027 euro. Nga kjo shumë janë shpenzuar 1,609,109 euro ose 22.43% e shumës së planifikuar”, thuhet në raport.

Këto të dhëna janë shpalosur edhe nga drejtoresha e Financave, Leonora Çerreti gjatë seancës së pestë të rregullt të Kuvendit të Komunës së Prizrenit. Informata rreth realizimit të buxhetit komunal për gjashtëmujorin e parë nuk është shoqëruar me debat gjatë kësaj seance.