Pas borës së madhe që ka mbuluar të martën Kosovën, Policia ka apeluar që ngasësit të kenë kujdes në trafik. Në një apel publik, Policia u ka bërë thirrje për kujdes sidomos automjeteve që aktualisht kanë goma të verës.
“Edhe pse jemi në stinën e pranverës dhe shumica e automjeteve në qarkullim mund të jenë me goma të verës, pas paralajmërimit se këtë javë gjatë natës dhe në orët e hershme të mëngjesit do të mbizotërojë mot me temperatura të ulëta (reshje të shiut, në lokacione të ndryshme mundësi për reshje bore, rrjedhje të ujit në rrugë e po ashtu edhe dëmtim i asfaltit dhe krijim i gropave), kërkohet nga shoferët që të shtohet kujdesi gjatë qarkullimit në rrugë, ku me rënien e temperaturave krijohen ngrica që rrezikojnë seriozisht pjesëmarrësit në trafik”, thuhet në apelin e Policisë.
Bazuar në këto kushte, Policia ka apeluar për përqendrim maksimal të shoferëve, mbajtje të distancës, përdorim të rripit të sigurisë, respektim të kufizimit të shpejtësisë, mospërdorim të telefonit e shmangie të manovrave.
Mot me temperatura të ulëta pritet të mbajë edhe disa ditë.
